ជនសង្ស័យម្នាក់ត្រូវបានកម្លាំងនគរបាលខណ្ឌឫស្សីកែវ ឃាត់ខ្លួនដកហូតថ្នាំញៀន២កញ្ចប់
ភ្នំពេញ៖ នគរបាលខណ្ឌឬស្សីកែវឃាត់ខ្លួនជនសង្ស័យជាមុខសញ្ញាជួញដូរថ្នាំញៀនម្នាក់ ដកហូតបានថ្នាំញៀនចំនួន២កញ្ចប់ កាលពីវេលាម៉ោង១១យប់ថ្ងៃទី២១ ខែឧសភា ឆ្នាំ២០១៩ ស្ថិតនៅត្រង់ចំណុចផ្លូវ១០៣ ក្នុងក្រុមទី១ ភូមិទួលថ្ងាន់ សង្កាត់ទួលសង្កែ២ ខណ្ឌឫស្សីកែវ ។
លោក គល់ យី អធិការនគរបាលខណ្ឌឫស្សីកែវ បានបញ្ជាក់ថា ជនសង្ស័យដែលឃាត់ខ្លួនឈ្មោះ ថាច គឹមស៊ា ភេទប្រុស អាយុ៣៤ឆ្នាំ ជនជាតិខ្មែរ មុខរបរនៅផ្ទះ ហើយជាមុខសញ្ញាជួញដូរថ្នាំញៀន ។
អធិការនគរបាលខណ្ឌបន្តទៀតថា បន្ទាប់ពីតាមស្រាវជ្រាវរហូតឈានទៅឃាត់ខ្លួនជនសង្ស័យ ដើម្បីយកមកធ្វើការសាកសួរតាមជំនាញជាច្រើនម៉ោងក្រោយមក កម្លាំងនគរបាលប៉ុស្ដិ៍ទួលសង្កែទី២ នៃអធិការដ្ឋាននគរបាលខណ្ឌឫស្សីកែវ បាននិងកំពុងស្វែងរកប្រភពនៃគ្រឿងញៀន និងបក្ខពួកដែលនៅសេសសល់ ដើម្បីមានវិធានការតាមបង្ក្រាបបន្តទៀត។
បច្ចុប្បន្នជនសង្ស័យនិងវត្ថុតាងស្ថិតក្រោមការឃុំខ្លួនបណ្ដោះអាសន្ននៅអធិការដ្ឋានខណ្ឌ ឫស្សីកែវ ដើម្បីសាកសួរនិងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការទៅតាមនិតិវិធី៕
