ស៊យមែន!! ម្ចាស់ដេប៉ូបើកលក់មិនទាន់ស្រួលបួលផង មានរថយន្តសាំយ៉ុងដឹកទំនិញចូលកៅឆាយទាំងព្រឹក

ភ្នំពេញ៖ សាំយ៉ុងដឹកទំនិញមួយគ្រឿងបោលចូលដេប៉ូលក់ចាប់ហ៊ួយនិងភេសជ្ជៈ ប៉ះចំម្ចាស់ដេប៉ូខ្ទៀតទៅផ្ទុបនឹងកញ្ចក់បែកខ្ចាយរងរបួសបញ្ជូនទៅសង្គ្រោះភ្លាមៗនៅមន្ទីរពេទ្យ ចំណែកអ្នកនៅក្បែរៗនោះសំណាងគេចទាន់រងរបួសតែបន្តិចបន្តួចប៉ុណ្ណោះ ។
ហេតុការណ៍ខាងលើកើតឡើងនៅវេលាម៉ោង ០៩:៤០នាទី ថ្ងៃទី០៥ ខែមិថុនា ឆ្នាំ២០១៩ នៅចំណុចផ្ទះលក់ចាប់ហ៊ួយនិងភេសជ្ជៈ យីហោ ចរិយា ស្ថិតក្នុងបុរីជីបម៉ុង ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

ប្រភពព័ត៌មានពីកន្លែងកើតហេតុបានអោយដឹងថា ម្ចាស់ដេប៉ូដែលរងរបួសមានឈ្មោះ ឃួន ចរិយា ភេទស្រី អាយុ៣៤ឆ្នាំ មុខរបរលក់ដូរ ស្នាក់នៅកនចំណុចកើតហេតុខាងលើ ។ ចំណែកអ្នកបើករថយន្តមានឈ្មោះ ជ្រ៊ុន ង៉ែត អាយុ២៤ឆ្នាំ មុខរបរ បើករថយន្តដឹកទំនិញ ស្នាក់នៅភូមិទួលទ្រា ឃុំលំចង់ ស្រុកសំរោង ខេត្តតាកែវ ។

ប្រភពបានបន្តទៀតថា មុនពេលកើតហេតុគេឃើញមានពូៗម៉ូតូឌុប៤ទៅ៥នាក់ អង្គុយលេងអុកនៅតូបកាត់សក់ នៅសំយ៉ាប់ផ្ទះលក់ចាប់ហ៊ួយនិងភេសជ្ជៈ យីហោ ចរិយា ខណៈពេលនោះក៏មានរថយន្តសាំយ៉ុងមួយគ្រឿង ពណ៌ស្លែរ ពាក់ស្លាកលេខ ភ្នំពេញ 2Y-9356 បើកបរដោយមបុរសម្នាក់ ក្នុងនោះមានម្តាយរួមដំណើរជាមួយផងដែរ បានធ្វើដំណើរតាមផ្លូវបេតុង ពីលិចទៅកើតក្នុងលឿនលឿន មកដល់ផ្លូវបំបែកជាបួន រថយន្តក៏មានបញ្ហាហ្វ្រាំង គឺជាន់មិនសុី ក៏ជ្រុលទៅបុកចូលផ្ទះលក់ចាប់ហ៊ួយនិងភេសជ្ជៈនោះតែម្តង ហើយបានបុកស្ត្រីម្ចាស់ផ្ទះ បណ្តាលអោយខ្ទៀតទៅប៉ះនឹងកញ្ចក់រងរបួសធ្ងន់ និងប៉ះម៉ូតូមួយគ្រឿងម៉ាកវីវ៉ាចតក្បែរនោះរងការខូចខាត ចំណែកអ្នកដែលកំពុងអង្គុយលេងអុកក្បែរនោះរត់គេចទាន់ រងរបួស្រាលៗតែប៉ុណ្ណោះ ។

ក្រោយបន្តិចសមត្ថកិច្ចមូលដ្ឋាន បានមកដល់កន្លែងកើតហេតុ ឃាត់យកអ្នកបើកបរយកទៅប៉ុស្តិ៍ចោមចៅទី១ ចំណែករថយន្តបង្ករត្រូវបានជំនាញចរាចរណ៍ខណ្ឌ ប្រគល់អោយជំនាញចរាចរណ៍ក្រុងវាស់វែង យកទៅទុកនៅការិយាល័យចរាចរណ៍ជើងគោក នៃ ស្នងការរដ្ឋាននគរបាលរាជធានីភ្នំពេញ ដើម្បីដោះស្រាយនៅពេលក្រោយ៕