សន្និបាតបូកសរុបការងារបោះឆ្នោតជ្រើសរើសក្រុមប្រឹក្សា អាណត្តិទី៣ និងការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩
ខេត្តសៀមរាប៖ ថ្ងៃពុធ ២រោច ខែជេស្ឋ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៩ ខែមិថុនា ឆ្នាំ២០១៩ នៅបន្ទប់ប្រជុំធំ រដ្ឋបាលខេត្តសៀមរាប មានរៀបចំសន្និបាតបូកសរុបការងារបោះឆ្នោតជ្រើសរើសក្រុមប្រឹក្សា អាណត្តិទី៣ និងការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ ក្រោមអធិបតីភាព លោក ពៅ ពិសិដ្ឋ អភិបាលរង នៃគណៈអភិបាលខេត្ត និងជាតំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងលោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្ត(PEC) និងមានការចូលរួមពី លោកមេបញ្ជាការយោធភូមិភាគទី៤ លោកមេបញ្ជាការកងពលធំអន្តរាគមន៍លេខ២លោកស្នងការរងនគរបាលខេត្ត លោកមេបញ្ជាការកងរាជអាវុធហត្ថខេត្ត លោកមេបញ្ជាការតំបន់ប្រតិបត្តិការសឹករងខេត្ត លោកប្រធាន-អនុប្រធានមន្ទីរ អង្គភាព អភិបាល អភិបាលរងក្រុង ស្រុក លោកមេឃុំ-ចៅសង្កាត់ ស្មៀនឃុំ-សង្កាត់ និងអ្នកពាក់ព័ន្ធនានាសរុបចំនួន ១៨៨នាក់ ស្រី២៨នាក់។
សូមរំលឹកថា ចាប់តាំងពីការបោះឆ្នោតជាតិ ឆ្នាំ១៩៩៣ រហូតមកដល់ការបោះឆ្នោតជ្រើសរើសក្រុមប្រឹក្សា អាណត្តិទី៣ ឆ្នាំ២០១៩ នេះ កម្ពុជាបានធ្វេីការបោះឆ្នោត ស្របតាមគោលការណ៍ នៃលទ្ធិប្រជាធិបតេយ្យ សេរីពហុបក្ស ទាំងការបោះឆ្នោតដោយផ្ទាល់ និងមិនផ្ទាល់បានយ៉ាងទៀងទាត់ ស្របតាមរដ្ឋធម្មនុញ្ញ ច្បាប់បោះឆ្នោតសរុបចំនួន ១៦ការបោះឆ្នោតរួចមកហេីយ។
ការបោះឆ្នោតជ្រើសរើសក្រុមប្រឹក្សា ការពិនិត្យបញ្ជីឈ្មោះ និងការចុះឈ្មោះបោះឆ្នោត គឺដេីម្បីធានាបាននូវភាពត្រឹមត្រូវ សុក្រឹត មិនលំអៀង និងមានតម្លាភាព ក្នុងការបោះឆ្នោត ក៏ដូចជាដេីម្បីសុខសន្តិភាព លទ្ធិប្រជាធិបតេយ្យ និងការអភិវឍ្ឍសង្គម ជានិច្ចជានិរន្តរ៍គណៈកម្មាធិការរៀបចំការបោះឆ្នោតជាតិ គណៈកម្មការរៀបចំការបោះឆ្នោតរាជធានី-ខេត្ត បានខិតខំបំពេញការងារ តួនាទី ភារកិច្ច របស់ខ្លួន ដេីម្បីធានារក្សានូវសុខសន្តិភាព សុវត្ថិភាព និងសណ្ដាប់ធ្នាប់ ដល់គណបក្សនយោបាយ បេក្ខជនឈរឈ្មោះបោះឆ្នោត ប្រជាពលរដ្ឋទូទៅក្នុងការចុះឈ្មោះក្នុងបញ្ជីឈ្មោះបោះឆ្នោត និងការពិនិត្យ ផ្ទៀងផ្ទាត់ នូវព័ត៌មានដ៏សុក្រិត ត្រឹមត្រូវ និងប្រកបដោយការទទួលខុសត្រូវ និងធានាបាននូវសុខសុវត្ថិភាពគ្រប់ការិយាល័យបោះឆ្នោត ការាប់សន្លឹកឆ្នោត និងគ្រប់ការិយាល័យចុះឈ្មោះបោះឆ្នោតទូទាំងប្រទេស។
លោក អភិបាលរងខេត្ត ក៏បានថ្លៃងអំណរគុណដល់គណៈកម្មការរៀបចំការបោះឆ្នោត និងអ្នកពាក់ព័ន្ធទាំងអស់ដែលបានខិតខំប្រឹងប្រែង លះបង់កម្លាំងកាយចិត្ត ក្នុងការអនុវត្តការងាររបស់ខ្លួនប្រកបដោយជោគជ័យ និងការទទួលខុសត្រូវខ្ពស់៕
