លួចរថយន្តតាក់សុីម៉ែត្រ ពីខណ្ឌ៧មករា បានសម្រេច មកជាប់ខ្នោះនៅខណ្ឌទួលគោក
ភ្នំពេញ ៖ ជនសង្ស័យ២នាក់ ក្នុងចំណោមបក្ខពួក៣នាក់ ត្រូវបានកម្លាំងនគរបាលប៉ុស្ដិ៍ បឹងកក់២ ធ្វើការឃាត់ខ្លួន កាលពីវេលាម៉ោង១ និង២០នាទីរំលងអាធ្រាត ឈានចូលថ្ងៃទី១ ខែកក្កដា ឆ្នាំ២០១៩ នៅក្បែរផ្លូវរថភ្លើង តាមបណ្ដោយផ្លូវ៦០៨ ស្ថិតក្នុងសង្កាត់បឹងកក់២ ខណ្ឌទួលគោល ដែលពាក់ព័ន្ធនិងករណីបន្លំលួចយករថយន្ត ។
សមត្ថកិច្ចបានឲ្យដឹងថា ជនសង្ស័យទាំង២នាក់ដែលត្រូវឃាត់ខ្លួន រួមមាន ៖ ទី១ ឈ្មោះ សុឹម សារិត ភេទប្រុស អាយុ៤៥ឆ្នាំមុខរបរសន្ត្តិសុខ មានស្រុកកំណើត នៅភូមិសំរោងធំ ឃុំបន្ទាយដែក ស្រុកគៀនស្វាយ ខេត្ត
កណ្ដាល - និងទី២ មានឈ្មោះ ណារិត ហៅងិន ភេទប្រុស អាយុ៣៩ឆ្នាំមុខរបររើសអេតចាយ ស្នាក់នៅភូមិឬស្សី សង្កាត់ស្ទឹងមានជ័យ២ ខណ្ឌមានជ័យ ។
សមត្ថកិច្ចឲ្យដឹងទៀតថា នៅពេលកើតហេតុ ជនរងគ្រោះបានបើករថយន្តម៉ាក Toyota Prus ពណ៌ក្រហម ពាក់ស្លាកលេខ ភ្នំពេញ 2T-6522 យកមកចតនៅការាស់សាំង សូគីមុិច តាមបណ្ដោយផ្លូវ នេរុ កែវផ្លូវលេខ២២៥ ក្នុងខណ្ឌ៧មករា ។ គ្រានោះដែរ ជនរងគ្រោះក៏បានឲ្យសោររថយន្តទៅជនសង្ស័យជាសន្ត្តិសុខ ដើម្បីរៀបចំ ។
ខណៈពេលនោះ ជនសង្ស័យក៏បានឆ្លៀតលួចយករថយន្តរបស់ជនរងគ្រោះ ព្រមទាំងដោះប្រព័ន្ធGPSចេញពីរថយន្តដើម្បីបំបាត់ការសង្ស័យ ។ ដោយឃើញបាត់រថយន្តទៅយូរពេក ម្ចាស់រថយន្តក៏បានឆែករក ព្រមទាំងរាយការណ៍ប្រាប់សមត្ថកិច្ចមូលដ្ឋានឲ្យជួយអន្តរាគមន៍ផងដែរ ។
ក្រោយមកជនសង្ស័យ២នាក់ត្រូវបានកម្លាំងនគរបាលខណ្ឌទួលគោក នាំខ្លួនយកទៅសាកសួរ និងកសាងសុំណុំរឿងចាត់តាមនីតិវិធីបន្ត -រីឯបក្សពួកម្នាក់ទៀតរត់គេចខ្លួនបាត់ ៕
