ចិន បើករថយន្តឆ្លងផ្លូវរថភ្លើងមិនប្រយ័ត្នត្រូវរថភ្លើងបុកខ្ទេចមួយចំពីចហៀង
ភ្នំពេញ៖ បុរស ជនជាតិចិន ម្នាក់រួមដំណើរជាមួយនិងនារីវ័យក្មេង២នាក់ បានបើករថយន្តឡិចសុីស មួយគ្រឿង ឆ្លងកាត់ផ្លូវរថភ្លើងមិនប្រយ័ត្ន ត្រូវរថភ្លើងបុកចំពីចហៀងពេញទំហឹង បណ្ដាលឲ្យរថយន្តខ្ទេចមួយចំហៀងសំណាងល្អមិនមានមនុស្សរងរបួស ។
គ្រោះថ្នាក់ចរាចរណ៍គួរឲ្យញាក់សាច់នេះ បានកើតឡើងកាលពីវេលាម៉ោង១២ និង១០នាទីរំលងអាធ្រាត ឈានចូលថ្ងៃទី១០ ខែកក្កដា ឆ្នាំ២០១៩ នៅចំណុចផ្លូវដែកផ្សារដីហុយ (តាមផ្លូវហាន់ណូយ) ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
យោងតាមប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុ មានរថភ្លើងមួយគ្រឿងបើកបំណងឆ្លងកាត់ផ្លូវហាន់ណូយដោយមានអ្នកប្រចាំការជួយឲ្យសញ្ញាសម្រាប់រថភ្លើងឆ្លងកាត់ តែមិនបានទាញប៉ារ៉ាស់ទំលាក់នោះទេ ដល់ពេលរថភ្លើងឆ្លងកាត់ ក៏មានរថយន្តម៉ាក ឡិចសុីស RX300មួយគ្រឿង ពណ៌ស្ក ពាក់ស្លាកលេខភ្នំពេញ 2T-4519 បើកបរដោយបុរសម្នាក់ជាជនជាតិចិន សង្ស័យស្រវឹងស្រា និងមាននារីជាជនជាតិខ្មែរ២នាក់រួមដំណើរជាមួយបានបើក ឆ្លងកាត់មិនបានប្រយ័ត្ន ក៏ត្រូវរថភ្លើងបុកចំពីចហៀងពេញទំហឹង បណ្ដាលឲ្យរថយន្តខ្ទៀតចេញពីផ្លូវរថភ្លើងប្រហែល១០ម៉ែត្រ រងការខូចខាតមួយចំហៀងយ៉ាងដំណំ ចំណែករថភ្លើងមិនមានការខូចខាតអ្វីនោះទេ សំណាងល្អមិនមានអ្នកណាម្នាក់រងរបួស ។
ក្រោយកើតហេតុ ភាគីខាងរថយន្តដែលរងការខូចខាតសុំយករថយន្តរបស់ខ្លួនយកទៅជួសជុលដោយខ្លួនឯង តែភាគីខាងរថភ្លើងមិនយល់ព្រម ព្រោះគិតថាខ្លួនឯងត្រូវ ក៏សុំឲ្យសមត្ថកិច្ចជំនាញយករថយន្តទៅរក្សាទុកនៅអធិការដ្ឋាននគរបាលខណ្ឌសែនសុខ រងចាំដោះស្រាយនៅពេលក្រោយ ៕
