ជិះម៉ូតូឌុបគ្នាពីស្រុកស្អាងមកលួចរឺម៉កកង់បីនៅភ្នំពេញមិនបានសម្រេចត្រូវជាប់ខ្នោះ
ភ្នំពេញ៖ ជនសង្ស័យ៣នាក់ ធ្វើសកម្មភាពលួច កង់បីឥណ្ឌាមិនបានសម្រេច ត្រូវប្រជាពលរដ្ឋ និងសមត្ថកិច្ច ដេញចាប់បាន
ហេតុការណ៍នេះបានកើតឡើងនៅវេលាម៉ោង២ និង២០នាទីរំលងអាធ្រាត ឈានចូលថ្ងៃទី១៧ ខែសីហា ឆ្នាំ២០១៩ នៅចំណុចមុខក្លឹបប៊្លូឡាញ តាមបណ្ដោយផ្លូវលេខ២៧១ សង្កាត់បឹងទំពុនទី១ ខណ្ឌមានជ័យ ។
-ជនសង្ស័យទាំង៣នាក់រួមមាន ៖ ទី១ ឈ្មោះ សម្បត្តិ ភេទប្រុស អាយុ២៧ឆ្នាំ មុខរបរមិនពិតប្រាកដ រស់នៅស្រុកស្អាង ខេត្តកណ្ដាល
-ទី២ឈ្មោះ កែវ សុធី ភេទប្រុស អាយុ៣១ឆ្នាំ មុខរបរមិនពិតប្រាកដ រស់នៅស្រុកស្អាង ខេត្តកណ្ដាល
-ទី៣ ឈ្មោះ ថុល លីឆេង ភេទប្រុសអាយុ២៩ ឆ្នាំ មុខរបរនិងស្នាក់នៅមិនពិតប្រាកដ។
-ចំណែកជនរងគ្រោះមានឈ្មោះ រតនា ភេទប្រុស អាយុ២៦ឆ្នាំ មុខរបររត់រឺម៉កកង់បីឥណ្ឌា ពាក់ស្លាកលេខភ្នំពេញ1HJ-8465 ស្នាក់នៅ ភូមិអក្សរ សង្កាត់សំរោងក្រោម ខណ្ឌពោធិ៍សែនជ័យ ។
តាមសម្ដីជនរងគ្រោះ និងអ្នករត់កង់បីបានឲ្យដឹងថា មុនកើតហេតុគេសង្កេតឃើញ ជនសង្ស័យ៣នាក់ខាងលើបានដើរមកក្បែររឺម៉កកង់បី របស់ជនរងគ្រោះ ដោយ២នាក់ធ្វើអង្គុយក្បែរ និងម្នាក់ទៀតធ្វើសកម្មភាពផ្ដាច់ប្រព័ន្ធភ្លើងបំណង់លួច ។
បន្ទាប់មក ក៏មានអ្នករត់រឺម៉កកង់បីឥណ្ឌាដូចគ្នាឃើញសកម្មភាពជនសង្ស័យខាងលើមិនល្អ ក៏ធ្វើការសួរនាំពួកគេ តែពួកគេបាននាំគ្នារត់គេចខ្លួន ទើបប្រជាពលរដ្ឋ និងសមត្ថកិច្ចនាំគ្នាដេញចាប់ខ្លួនបានទាំង៣នាក់ ។
ក្រោយឃាត់ខ្លួនជនសង្ស័យខាងលើបានភ្លាមៗ សមត្ថកិច្ចមូលដ្ឋានបាននាំខ្លួនទៅកាន់ប៉ុស្ដិ៍នគរបាលរដ្ឋបាល បឹងទំពុនទី១ ដើម្បីធ្វើការសាកសួរ និងកសាងសុំណុំរឿងបញ្ចូនទៅអធិការដ្ឋាននគរបាលខណ្ឌមានជ័យចាត់ការបន្តតាមនីតិវិធី ៕
