ចិនបើករថយន្តបុកម៉ូតូអូសជាង១០០ម៉ែត្រខ្ទាតម្ចាស់ចេញរងរបួសសង៦០០ដុល្លារបញ្ចប់រឿង
ភ្នំពេញ៖ បុរសជនជាតិចិនម្នាក់បើករថយន្តស៊េរីទំនើបម៉ាក រ៉េងរ៉ូវើ និងអ្នកដំណើរ២នាក់ទៀត បានបើករថយន្តជ្រុលទៅបុកម៉ូតូមួយគ្រឿង ជិះដោយបុរសម្នាក់ចំពីចហៀងពេញទំហឹង បណ្តាលឲ្យជាប់ម៉ូតូក្រោមរថយន្តអូសជាង១០០ម៉ែត្រ សំណាងម្ចាស់ខ្ទាតចេញរងរបួសស្រាល។
គ្រោះថ្នាក់ចរាចរណ៍នេះកើតឡើងកាលពីវេលាម៉ោង១១ និង៣០នាទីយប់ ថ្ងៃទី១៨ ខែសីហាឆ្នាំ២០១៩ នៅតាមបណ្តោយផ្លូវ៣៦០ កែងនិងផ្លូវ១០៥សង្កាត់បឹងកេងកង២ ខណ្ឌបឹងកេងកង ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់ជិះម៉ូតូមួុយគ្រឿងម៉ាក ហុងដាឌ្រីម ស៊េរី០១៣ ពណ៌ខ្មៅ ស្លាកលេខកណ្តាល1O-6324 ដំណើរតាមបណ្តោយផ្លូវ១០៥ ទិសដៅពីត្បូងទៅជើងខណះមកដល់ចំណុចកើតហេតុផ្លូវបែកជាបួន ក៏មានរថយន្តមួយគ្រឿងម៉ាករ៉េងរ៉ូវើ ពណ៌ខ្មៅ ពាក់ស្លាកលេខភ្នំពេញ2AV-9797បើកបរដោយបុរសជនជាតិចិនម្នាក់រួមដំណើរនិងបុរសចិនពីរនាក់ទៀតធ្វើដំណើតាមបណ្តោយផ្លូវ៣៦០ ទិសដៅពីកើតទៅលិច ក្នុងល្បឿនលឿន មិនប្រយត្ន័ជ្រុលបុកចំ ពាក់កណ្តាលម៉ូតូពេញទំហឹងធ្វើឲ្យម្ចាស់ខ្ទាតចេញរងរបួសស្រាល ចំណែកម៉ូតូជាប់ក្រោមរថយន្តអូសជាង១០០ម៉ែត្រត្រូវពលរដ្ឋជួយឃាត់បាន ។
ក្រោយកើតហេតុ សមត្ថកិច្ចមូលដ្ឋាននិងជំនាញចរាចរណ៍បានចុះមកដល់ តែដោយភាគីទាំងសងខាងសូមធ្វើការសម្របសម្រួលគ្នា ដោយខាងភាគីរថយន្តបង្កបានចេញសំណងចំនួន៦០០ដុល្លារទៅឲ្យភាគីខាងម៉ូតូដើម្បីបញ្ចប់រឿងនៅនិងកន្លែងកើតហេតុ៕
