លោក ហង់ ជួនណារ៉ុន ៖ ប្រឡងសញ្ញាបត្រ មធ្យមសិក្សាទុតិយភូមិ ឆ្នាំនេះមាន បេក្ខជនប្រឡងជិត១២ម៉ឺននាក់
ភ្នំពេញ៖ សម័យប្រឡង យកសញ្ញាបត្រ មធ្យមសិក្សាទុតិយភូមិ ឬ ហៅថា ប្រឡងបាក់ឌុប ថ្ងៃដំបូង ចាប់ផ្តើមហើយនៅថ្ងៃចន្ទ ទី១៩ ខែសីហា ឆ្នាំ២០១៩នេះ ជាមួយបេក្ខជនចូលរួមប្រឡងសរុបជិត១២ម៉ឺននាក់។ រដ្ឋមន្ត្រីក្រសួងអប់រំយុវជននិងកីឡា លោក ហង់ ជួនណារ៉ុន អញ្ជើញបើកវិញ្ញាសារប្រឡង នៅមណ្ឌលប្រឡងក្នុងវិទ្យាល័យព្រះស៊ីសុវត្ថិ ក្នុងរាជធានីភ្នំពេញ ដូចបណ្តាឆ្នាំកន្លងទៅដែរ ។
តាមការបញ្ជាក់របស់ក្រសួងអប់រំ យុវជន និងកីឡាការប្រឡងបាក់ឌុបនៅឆ្នាំនេះ មានបេក្ខជនសរុប ១១៧,០២៤នាក់(ស្រី៦០,៤២១នាក់)ថយចុះ ៣៧នាក់បើធៀបនឹងឆ្នាំ២០១៨។ ចែកចេញ ២០២មណ្ឌល (ថ្នាក់វិទ្យាសាស្ត្រ ៧៥មណ្ឌល និងថ្នាក់វិទ្យាសាស្ត្រសង្គម ១២៧មណ្ឌល) ស្មើនឹង ៤,៧២៥បន្ទប់។ បេក្ខជនប្រឡងថ្នាក់វិទ្យាសាស្ត្រ មានចំនួន ៤៤,៦៨៣នាក់ ស្រី២៥,២៨៥នាក់ (១,៨១០បន្ទប់) ថ្នាក់វិទ្យាសាស្ត្រសង្គម មានចំនួន ៧២,៣៤១នាក់ ស្រី ៣៥,១៣៦នាក់ (២,៩១៥បន្ទប់)។
ដើម្បីធ្វើឱ្យការប្រឡងទទួលបានជោគជ័យតាមគោលដៅដែលបានគ្រោងទុក ក្រសួងបានពង្រាយមន្ត្រីគ្រប់គ្រងការប្រឡងនេះ សរុប ១៧,៤៣០នាក់ ក្នុងនោះ អប្បមាទ ៦០៦នាក់ ជំនួយការអប្បមាទ ដែលជាគរុនិសិ្សត ២,៤០៥នាក់ អនុរក្ស ១០,៦៣១នាក់ ប្រធានមណ្ឌល២០២ គណៈកម្មការត្រួតពិនិត្យតាមអគារ ១,១៨១នាក់ និងគណៈកម្មការកណ្តាល ២,៤០៥នាក់។
លោក រស់ សុវាចា បានឱ្យដឹងថា មន្ត្រីទទួលភារកិច្ចលើការប្រឡងនេះ បានធ្វើដំណើរទៅដល់គោលដៅរៀងៗខ្លួនហើយ ត្រៀមស្វាគមន៍បេក្ខជនប្រឡង និងបំពេញការងារតាមតួនាទី និងភារកិច្ច។
ក្នុងបេសកកម្មកំណែទម្រង់ស៊ីជម្រៅលើការប្រឡងបាក់ឌុបរបស់លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាតាំងពីឆ្នាំ២០១៤មកនោះ អង្គភាពប្រឆាំងអំពើពុករលួយតែងតែចាត់អ្នកសង្កេតការណ៍ចូលរួមតាមដាន និងសង្កេតទៅលើការប្រឡងនេះ។ ប៉ុន្តែនៅឆ្នាំ២០១៩នេះ មិនមានវត្តមានអ្នកសង្កេតការណ៍ពីអង្គភាពប្រឆាំងអំពើពុករលួយ ចូលរួមតាមដាន និងអង្កេតទៅលើការប្រឡងទៀតនោះឡើយ។
បើទោះបីមិនមានវត្តមានអ្នកសង្កេតការណ៍ពីអង្គភាពប្រឆាំងអំពើពុករលួយយ៉ាងណាក្តី តែក្រសួងអប់រំ បានអះអាងថា ការប្រឡងនៅតែធ្វើឡើងដោយឈរលើភាពត្រឹមត្រូវ តម្លាភាព និងយុត្តិធម៌ តាមគោលការណ៍ «អ្នកចេះ គឺជាប់»។
លោក រស់ សុវាចា បានគូសបញ្ជាក់យ៉ាងដូច្នេះ «បើសិនជាមានករណីអំពើពុករលួយ កើតឡើងនៅក្នុងគ្រប់ដំណាក់កាល នៃការប្រឡងមធ្យមសិក្សាទុតិយភូមិ ក្រសួងអប់រំ នឹងនៅតែបន្ដសហការជាមួយ ACU ដោយធ្វើចំណាត់ការយោងទៅតាមផ្លូវច្បាប់ជាធរមាន»។
សូមបញ្ជាក់ថា ការប្រឡងនៅថ្ងៃទី១៩ ខែសីហា នេះ សម្រាប់ថ្នាក់វិទ្យាសាស្ត្ររួមមានមុខវិជ្ជា៖ ប្រវត្តិវិទ្យា, ជីវវិទ្យា, គីមីវិទ្យា និងភាសាបរទេស។ ថ្នាក់វិទ្យាសាស្ត្រសង្គមរួមមានមុខវិជ្ជា៖ ផែនដី និងបរិស្ថានវិទ្យា, ប្រវត្តិវិទ្យា, ភូមិវិទ្យា និងភាសាបរទេស។
ថ្ងៃទី២០ខែសីហា សម្រាប់ថ្នាក់វិទ្យាសាស្ត្ររួមមានមុខវិជ្ជា៖ អក្សរសាស្ត្រខ្មែរ, រូបវិទ្យា និងគណិតវិទ្យា។ ថ្នាក់វិទ្យាសាស្ត្រសង្គមរួមមានមុខវិជ្ជា៖ គណិតវិទ្យា, សីលធម៌ ពលរដ្ឋវិជ្ជា និងអក្សរសាស្ត្រខ្មែរ៕
