ចាប់ខ្លួនចោរម្នាក់ក្រោយពីធ្វើសកម្មភាពលួចម៉ូតូ
ភ្នំពេញ៖ ជនសង្ស័យម្នាក់ធ្វើសកម្មភាពលួចម៉ូតូបានសម្រេចរួចជិះគេចខ្លួន ជាច្រើនម៉ោងតែត្រូវម្ចាស់ម៉ូតូប្រទះឃើញចាប់ខ្លួនប្រគល់ឲ្យនគរបាល បង្កការភ្ញាក់ផ្អើល កាលពីវេលាម៉ោង១០ យប់ថ្ងៃទី១៩ខែសីហាឆ្នាំ២០១៩ នៅម្ដុំផ្សារសឡា សង្កាត់ស្ទឹងមានជ័យ១ ។
ជនសង្ស័យមានឈ្មោះ ត្រឹក ប៉ុណ្ណារ៉ា អាយុ២៩ឆ្នាំមុខរបរ មិនពិតប្រាកដ ស្នាក់ភូមិថ្មី សង្កាត់ស្ទឹងមានជ័យទី៣ ខណ្ឌមានជ័យ ។
នគរបាលបានឲ្យដឹងថា នៅវេលាម៉ោង៩និង៣០នាទីព្រឹកថ្ងៃទី១៩ខែសីហាឆ្នាំ២០១៩ ជនរងគ្រោះបានជិះម៉ូតូមួយគ្រឿងម៉ាក់ ហុងដាឌ្រីម សេរី២០១៨ ពណ៌ខ្មៅ ដែលស្លាកលេខភ្នំពេញ 1HA-9569 ចេញពីម្ដុំស្ទឹងមានជ័យ បំណងជិះឡើងផ្លូវ៣៧១ ប៉ុន្ដែ មិនទាន់ដល់ទេ ជនរងគ្រោះឈប់បត់ជើងតូច តែមិនបានដកសោរ ស្រាប់តែ ជនសង្ស័យ បានលួចឡើង ជិះម៉ូតូគេចបាត់ស្រមោល បន្ទាប់មកជនរងគ្រោះបានមកដាក់ពាក្យបណ្ដឹងនៅប៉ុស្តិនគរបាល បឹងទំពុន២ ឲ្យសមត្ថកិច្ច ជួយស្វែងរកម៉ូតូ លុះដល់ម៉ោង១០យប់ថ្ងៃដដែលជនរងគ្រោះបានប្រទះឃើញជនសង្ស័យជិះម៉ូតូរបស់ខ្លួននៅម្ដុំផ្សារសឡា សង្កាត់ស្ទឹងមានជ័យ១ ក៏ដេញតាមចាប់ខ្លួនបានប្រគល់ឲ្យនគរបាលប៉ុស្ដិ៍បឹងទំពុន២ យកមកសួរនាំ។
នគរបាលបានបន្តថា នៅចំពោះមុខសមត្ថកិច្ចជនសង្ស័យបានឆ្លើយបដិសេធថា ខ្លួនមិនបានលួចម៉ូតូរបស់ជនរងគ្រោះទេ គឺខ្លួនបានដូរម៉ូតូជាមួយជនសង្ស័យម្នាក់ទៀតដោយថែមលុយឲ្យគេចំនួន៣០០ ដុល្លារទៀត ។
បច្ចុប្បន្នជនសង្ស័យត្រូវបាននគរបាលសាកសួរ និង កសាងសំណុំរឿងបញ្ជូនទៅអធិការនគរបាលខណ្ឌមានជ័យដើម្បីចាត់ការបន្ដ ៕ 
