ជិះម៉ូតូលឿនដល់ផ្លូវកោងមិនប្រយត្ន័ជ្រុលទៅបុកឃឿនចញ្ចើមផ្លូវបោកនិងបង្គោលភ្លើងស្លាប់គួរឲ្យសង្វេក
ភ្នំពេញ ៖ គួរឲ្យរន្ធត់ណាស់បុរសម្នាក់ជិះម៉ូតូPCX ក្នុងល្បឿនលឿន ខណៈដល់ផ្លូវកោងមិនប្រយត្ន័ក៏ជ្រុលទៅបុកឃឿនចញ្ចើមផ្លូវបោកនិងបង្គោលភ្លើងស្លាប់ ៖ គ្រោះថ្នាក់នេះកើតឡើងកាលពីវេលាម៉ោង០៤និង១០នាទីទាបភ្លឺ ថ្ងៃទី២២ខែសីហាឆ្នាំ២០១៩ នៅមុខវិទ្យាល័យ ជា សុីម សាមគ្គី តាមបណ្ដោយផ្លូវ២៧១ សង្កាត់ស្ទឹងមានជ័យ១ ខណ្ឌមានជ័យ។
-សពជនរងគ្រោះ មានឈ្មោះ មាស រដ្ឋា ភេទប្រុស អាយុ៣៤ឆ្នាំ ស្នាក់នៅសង្កាត់ស្រះចក ខណ្ឌដូនពេញ - ជិះម៉ូតូម៉ាក PCX ពណ៌ក្រហម ពាក់ស្លាកលេខភ្នំពេញ 1GU-9519 ។
យោងតាមកាមរ៉ាសុវត្តិភាព ឃើញថា ពេលកើតហេតុ ជនរងគ្រោះជិះម៉ូតូ តែម្នាក់ឯង ធ្វើដំណើរតាមបណ្ដោយផ្លូវ២៧១ ទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុ ផ្លូវកោង ជនរងគ្រោះមិនបានបន្ថយល្បឿនក៏ជ្រុលចង្កូតទៅបុកឃឿនចំញ្ចើមផ្លូវ រួចផ្លោងជាង១០ម៉ែត្រទៅបោកនិងបង្គោលភ្លើងបែកក្បាលស្លាប់ភ្លាមៗសង្វេក ។ ចំណែកបង្គោលភ្លើងនិងម៉ូតូរងការ ខូចខាតតិចតួច ។
ក្រោយកើតហេតុ សមត្ថកិច្ចជំនាញ បានចុះមកធ្វើកំណត់ហេតុប្រគល់សពឲ្យទៅសាច់ញាតិយកទៅធ្វើបុណ្យតាមប្រពៃណី ។ ចំណែកម៉ូតូ សមត្ថកិច្ច យកទៅរក្សាទុក រង់ចាំយកឯកសារផ្ទៀងប្រគល់ឲ្យក្រុមគ្រួសារនៅពេលក្រោយ ៕
