ជនជាតិចិនម្នាក់ជិះកង់បីត្រូវចោរឆក់ទូរសព្ទ័ទាញធ្លាក់ពីលើកង់បីស្លាប់
ភ្នំពេញ៖ បុរសជនជាតិចិនម្នាក់ជិះម៉ូតូកង់បីឥណ្ឌាត្រូវជនសង្ស័យ២នាក់ធ្វើសកម្មភាពឆក់ទូរស័ព្ទបានសម្រេច បណ្ដាលឲ្យធ្លាក់ពីកង់បីរបួសធ្ងន់ ត្រូវរថយន្តសង្គ្រោះបន្ទាន់ដឹកទៅដល់មន្ទីរពេទ្យដាច់ខ្យល់ស្លាប់
ហេតុការណ៍ភ្ញាក់ផ្អើលនេះកើតឡើងកាលពីវេលាម៉ោង០៩និង៤០នាទីយប់ថ្ងៃទី២៩ ខែសីហា ឆ្នាំ២០១៩ នៅតាមបណ្ដោយផ្លូវលេខ១៧៣ កែងផ្លូវលេខ៣១០ ក្នុងសង្កាត់ទួលស្វាយព្រៃទី១ ខណ្ឌបឹងកេងកង ។
សពជនរងគ្រោះមិនត្រូវបានគេស្គាល់ឈ្មោះនោះទេ គ្រាន់តែដឹងថា ជាជនជាតិចិន ។
យោងតាមប្រភពព័ត៌មានពីអ្នករត់កង់បីឥណ្ឌាបានឲ្យដឹងថា មុនពេលកើតហេតុ គាត់បានដឹកជនរងគ្រោះចេញពីខារ៉ាអូខេមួយកន្លែង ដោយធ្វើដំណើរ តាមបណ្ដោយផ្លូវលេខ១៧៣ ទិសដៅពីត្បូងទៅជើង ខណៈមកដល់កែងផ្លូវលេខ៣១០ស្រាប់តែមានជនសង្ស័យ២នាក់ ជិះម៉ូតូ១គ្រឿងឌុបគ្នាធ្វើសកម្មភាពឆក់ទូរស័ព្ទដៃពី បុរសជនជាតិចិន ដែលអង្គុយលើកង់បី បានសម្រេច បណ្ដាលឲ្យជនរងគ្រោះ ធ្លាក់ពីលើកង់បីបោកក្បាលនិងថ្នល់របួសធ្ងន់ ។ ចំណែកជនសង្ស័យ បន្ទាប់ពីធ្វើសកម្មភាពរួច បានជិះម៉ូតូគេចខ្លួនបាត់ស្រមោល ។
ក្រោយកើតហេតុភ្លាមៗជនរងគ្រោះត្រូវបានរថយន្ត សាមុយដឹកយកទៅសង្គ្រោះបន្ទាន់នៅមន្ទីរពេទ្យ តែអកុសល ខណៈទៅដល់មន្ទីរពេទ្យជនរងគ្រោះបានស្លាប់ ។ បន្ទាប់មកសមត្ថកិច្ចមូលដ្ឋានបានចុះមកដល់កន្លែងកើត ហេតុ បានត្រឹមតែសួរនាំទៅប្រជាពលរដ្ឋនិង ម្ចាស់ម៉ូតូកង់បីឥណ្ឌារួចនាំគ្នាជិះម៉ូតូទៅបាត់។
-ចំណែក សព ជនរងគ្រោះ ត្រូវបានក្រុមគ្រូពេទ្យដឹកយកទៅតម្កល់នៅវត្តស្ទឹងមានជ័យ រង់ចាំស្រាវជ្រាវរកសាច់ញាតិបន្ត ៕
