រន្ធត់ណាស់ ! ជិះម៉ូតូឆ្លងផ្លូវ ត្រូវរថយន្ដបុកស្លាប់ យ៉ាងអាណោចអធម៌
ភ្នំពេញ៖ គួរឲ្យអាសូរ! បុរសម្នាក់ជិះម៉ូតូឆ្លងផ្លូវមិនប្រុងប្រយ័ត្នត្រូវរថយន្ដដឹកសំបកទឹកសុទ្ធបើកលឿនជាន់ហ្វ្រាំងមិនទាន់ជ្រុលទៅបុកពេញទំហឹងបណ្ដាលអោយស្លាប់ភ្លាមៗគួរឲ្យរន្ធត់
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៩និង៤៥នាទីព្រឹក ថ្ងៃទី១៩ ខែកញ្ញា ឆ្នាំ២០១៩ នៅចំណុចផ្លូវបំបែកចូលវត្តហារ ផ្លូវ៥០ម៉ែត្រ ភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ។
សមត្ថកិច្ចបានអោយដឹងថាជនរងគ្រោះដែល ស្លាប់មានឈ្មោះ ពិសឹដ្ធ សាមឹ ភេទប្រុស អាយុ៣៧ឆ្នាំ មានស្រុកកំណើតនៅភូមិខ្នារធំ ឃុំព្រៃឃ្នេស ស្រុកមេសាង ខេត្តព្រៃវែង។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញជនរងគ្រោះជិះម៉ូតូម៉ាកហុងដាឌ្រីមសង់ពណ៍ខ្មៅ ពាក់ស្លាកលេខ ភ្នំពេញ1AY-6204 ធ្វើដំណើរតាមបណ្ដោយផ្លូវ៥០ម៉ែត្រ ទិសដៅពីកើតទៅលិច ខណៈមកដល់ចំណុចកើតហេតុជនរងគ្រោះបានបើកឆ្លងផ្លូវស្របពេលដែលរថយន្ដម៉ាកហុីយ៉ានដាយពណ៌ស ពាក់ស្លាកលេខភ្នំពេញ2AY-4350ដឹកសំបកដបទឹកសុទ្ធ បើក ក្នុងល្បឿនលឿនមិនបានប្រុងប្រយត្ន័ជាន់ហ្វ្រាំងមិនទាន់ក៏ជ្រុលទៅបុកចំពីមុខពេញទំហឹងបណ្ដាលអោយជនរងគ្រោះបោកក្បាលជាមួយកញ្ចក់រថយន្ដស្លាប់ភ្លាមៗតែម្ដង។ ប្រភពបន្តថា បន្ទាប់ពីកើតហេតុតៃរថយន្ដចុះរត់គេចខ្លួនបាត់។
ក្រោយមកកម្លាំងសមត្ថកិច្ចមូលដ្ឋានបានចុះមកដល់កន្លែងកើតហេតុនិងបានទំនាក់ទំនងទៅកម្លាំងជំនាញមកវាស់វែងយករថយន្ដនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ។ ចំណែកសពជនរងគ្រោះសមត្ថកិច្ចបានទាក់ទងទៅក្រុមគ្រួសារមកទទួលយកទៅធ្វើបុណ្យតាមប្រណី៕
