សង្ស័យស្រវឹងស្រាបើករថយន្តមិនប្រយត្ន័បុករបាំងថ្ម ដាច់កាឡេកង់មុខ
ភ្នំពេញ៖ បុរសម្នាក់សង្ស័យស្រវឹងស្រា បើករថយន្តទៅបុករបាំងថ្ម ចែកទ្រូងផ្លូវបាក់មួយកង់រថយន្តដាច់កាឡេកង់ខាងមុខទៅលែងរួច ៖ គ្រោះថ្នាក់ចរាចរណ៍នេះកើតឡើងនៅវេលាម៉ោង១និង៣០នាទីរំលងអធ្រាត្រចូលថ្ងៃទី២០ខែកញ្ញាឆ្នាំ២០១៩នៅតាមបណ្ដោយផ្លូវសុធារស មុខសណ្ឋាគារ សូហ្វីតែលភ្នំពេញ ក្នុងសង្កាត់ទន្លេបាសាក់ ខណ្ឌចំការមន ។
តាមប្រភពពីប្រជាពលរដ្ឋនៅកន្លែងកើតហេតុ បានឲ្យដឹងថា មុនកើតហេតុគេឃើញរថយន្តបង្កម៉ាក nissan navara ពណ៌ស ពាក់ស្លាកលេខភ្នំពេញ កោះកុង2B-6000 បើកបរដោយបុរសម្នាក់សង្ស័យស្រវឹងស្រា ធ្វើដំណើរតាមបណ្តោយផ្លូវសុធារស ទិសដៅពីជើងទៅត្បូង ក្នុងល្បឿនយ៉ាងលឿន ខណៈមកដល់ចំនុចកើតហេតុ ស្រាប់ តែរេចង្កូតមកឆ្វេងដៃជ្រុលទៅបុករបាំងថ្មពុះចែកទ្រូងផ្លូវ ពេញទំហឹង បណ្ដាលឲ្យបាក់១កង់ ហើយរថយន្តបង្កបានដាច់កាឡែកង់មុខខាងឆ្វេងខូចខាតយ៉ាងដំណំ តែនៅមិនទាន់អស់ល្បឿនបានទៅមុខប្រហែល៥០ម៉ែត្រទើបឈប់ទៅមុខលែងរួច សំណាងមិនបណ្ដាលឲ្យមានអ្នករងរបួស គ្រាន់តែខូចរថយន្ត និងរបាំងថ្ម តែប៉ុណ្ណោះ។
ក្រោយពេលកើតហេតុ សមត្ថកិច្ចមូលដ្ឋាននិងជំនាញមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ រង់ចាំដោះស្រាយតាមច្បាប់នៅពេលក្រោយ ៕
