ជនមិនស្គាល់មុខផ្ទុះអាវុធ២គ្រាប់រួចបានបើករថយន្តគេចបាត់
ភ្នំពេញ ៖ ផ្ទុះអាវុធ២គ្រាប់បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចទាំងកណ្ដាលអាធ្រាត្រ
ហេតុការណ៍នេះបានកើតឡើងកាលពីវេលាម៉ោង២ រំលងអាធ្រាត្រចូលថ្ងៃទី២៦ ខែកញ្ញា ឆ្នាំ២០១៩ នៅជាប់របងមន្ទីពេទ្យ ព្រះកុសុមៈ(ហៅពេទ្យលោកសង្ឃ )តាមបណ្ដោយផ្លូវ២៦៥ កែងនិងផ្លូវ ១៥០ ក្នុងសង្កាត់ទឹកល្អក់២ ខណ្ឌទួលគោក ។
យោងតាមប្រភពព័ត៌មានពីសន្តិសុខដែលយាមប្រចាំកាក្បែកន្លែងកើតហេតុបានឲ្យដឹងថា មុនកើតហេតុគេឃើញមានរថយន្តមួយគ្រឿងម៉ាក ព្រូស ពណ៌ស្ក មិនចាំស្លាកលេខ បើកតាមបណ្ដោយផ្លូវ២៦៥ ខណៈមកដល់ចំណុចកើតហេតុ ខាងក្រោយ មន្ទីពេទ្យលោកសង្ឃ ក៏ឈប់រថយន្ត រួចដកកាំភ្លើងបាញ់មេឃ១គ្រាប់ ក៏បន្តដំណើរទៅមុខបានប្រហែលជា១០០ម៉ែត្រក៏បានបាញ់១គ្រាប់ទៀត ហើយក៏បានបើករថយន្តគេចបាត់ពីកន្លែងកើតហេតុតែម្ដង ដោយមិនដឹងថា មានរឿងអ្វីនោះទេ ។
ក្រោយកើតហេតុសមត្ថកិច្ចមូលដ្ឋានបានចុះមកដល់ ចំណុចដែលផ្ទុះអាវុធ បានរកឃើញសំបកគ្រាប់ ហើយបានយកទៅរក្សាទុកដើម្បីធ្វើការស្រាវជ្រាវ រកជនដៃដល់យកមកផ្ដន្ទាទោសតាមច្បាប់ ៕
