អីក៏យ៉ាងនេះ! នាំគ្នាចូលកោសជប់ ឆ្លៀតលួចស្លាកយីហោ ត្រូវម្ចាស់ផ្ទះ ចាប់បានម្នាក់ប្រគល់ឲ្យសមត្ថកិច្ច
ភ្នំពេញ៖ បុរសម្នាក់ត្រូវបានម្ចាស់ផ្ទះ ម៉ាស្សារ កោសជប់ ឃាត់ខ្លួនប្រគល់ទៅឲ្យសមត្ថកិច្ច ខណៈ២នាក់ទៀតគេចខ្លួនបាត់ បន្ទាប់ពីចូលកោសជប់រួចឆ្លៀតឱកាសលួចស្លាកយីហោ
ហេតុការណ៍នេះបានបង្កការភ្ញាក់ផ្អើលកាលពីវេលាម៉ោងជាង១២ រំលងអាធ្រាត្រចូលថ្ងៃទី៧ខែតុលាឆ្នាំ២០១៩ នៅចំណុចផ្ទះម៉ាស្សារ កោសជប់(យីហោ ៧៧៧៧) ផ្លូវ256 សង្កាត់ទឹកល្អក់៣ ខណ្ឌទួលគោក។
បុរសដែលត្រូវបានម្ចាស់ផ្ទះ ឃាត់ខ្លួនមានឈ្មោះ ម៉ៅ មុខរបរដឹកផ្លែរឈើនៅផ្សារដើម (គ) ចំណែកបក្ខពួក២នាក់ទៀតម្នាក់ឈ្មោះទូច និងម្នាក់ទៀតមិនស្គាស់ឈ្មោះបានគេចខ្លួនបាត់។
បើតាមសម្តីនារីជាអ្នកម៉ាស្សារកោសជប់បានប្រាប់ឲ្យដឹងថា មុនកើតហេតុបុរសដែលឃាត់ខ្លួននិងគ្នាម្នាក់ទៀតបានចូលមករកឲ្យរូបគាត់កោសជប់ ពេលនោះគាត់ ប្រាប់ថាតម្លៃកោសជប់ មួយនាក់១៥០០០រៀល ខណៈនោះ ជនសង្ស័យម្នាក់បានយល់ព្រមរួចបានឡើងទៅឡៅតឿ ដែលជាកន្លែងកោសជប់ ចំណែកម្នាក់ទៀតបានអង្គុយចាំនៅក្នុងផ្ទះក្រោម ឡៅតឿ លុះពេលរូបគាត់កោសជប់ ឲ្យជនសង្ស័យរួច ស្រាប់តែក្រឡេក មើលទៅក្រោមឃើញជនសង្ស័យដែលអង្គុយចាំដើរចេញក្រៅ ហើយលើកស្លាកយី ហោ កោសជប់ ដាក់លើរឺម៉កម៉ូតូមួយគ្រឿងដែលម្នាក់ទៀតចាំនៅខាងក្រៅនាំគ្នាយកទៅបាត់ ភ្លាមៗគាត់បានឃាត់ខ្លួនបុរសជាជនសង្ស័យម្នាក់ដែលចូលមកកោសជប់ រួចរាយការណ៍ឲ្យសមត្ថកិច្ច ។
ក្រោយមកបុរសជាជនសង្ស័យត្រូវបានកម្លាំងសមត្ថកិច្ចប៉ុស្តិ៍នគរបាល ទឹកល្អក់៣មកនាំខ្លួនយកទៅសួរនាំ និងចាត់ការតាមនិតិវិធីច្បាប់៕
