បើករថយន្តគេចពីម៉ូតូទៅបុករបាំងថ្មចែកផ្លូវត្រូវសមត្ថកិច្ចវាស់វែងយកទៅរក្សាទុករងចាំដោះស្រាយ
ភ្នំពេញ៖ បុរសម្នាក់បើករថយន្ត គេចពីម៉ូតូជ្រុលចង្កូតបុករបាំងថ្ម ចែកទ្រូងផ្លូវបាក់មួយកង់ ចំណែករថយន្តរងការខូចខាតយ៉ាងដំណំសំណាងមិនបង្កឲ្យមានអ្នករងរបួស
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២ និង៤០នាទីរំលងអធ្រាត្រចូលថ្ងៃទី៧ខែតុលាឆ្នាំ២០១៩ នៅចំណុចមុខ ធនាគារ អេសុីលីដា តាមបណ្ដោយផ្លូវលេខ ២១៧សង្កាត់ វាលវង់ខណ្ឌ៧មករា ។
បើតាមសម្តី បុរសជាម្ចាស់រថយន្តបានឲ្យដឹងថា មុនកើតហេតុរូបគាត់បានបើករថយន្តមួយគ្រឿងប្រភេទសាំយ៉ុងពណ៌ស ស្លាកលេខកណ្តាល2C-2565 ដឹកអ្នកដំណើរប្រុសស្រីបួននាក់ចេញពីម្តុំព្រែកតាមាក់ បំណងយកអ្នកដំណើរដែលជាភ្ញៀវ ទៅដាក់នៅផ្សារដើម(គ)ដោយធ្វើដំណើរតាមផ្លូវព្រះមុន្នីរ៉េត ទិសដៅពីកើតទៅលិច ខណៈមកដល់ចំណុចកើតហេតុខាងលើបានគេចពីម៉ូតូមួយគ្រឿងជ្រុលចង្កូតទៅបុករបាំងថ្ម ពុះចែកទ្រូងផ្លូវបាក់មួយកង់រថយន្តខូចខាតផ្នែកខាងមុខយ៉ាងដំណំទៅលេងរួចសំណាងល្អគ្មានអ្នករងរបួស។
ក្រោយកើតហេតុសមត្ថកិច្ចបានចុះមកដល់ធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំដោះស្រាយតាមផ្លូវច្បាប់៕
