បុរសអ្នករត់ម៉ូតូឌុបម្នាក់ត្រូវចោរសម្លាប់ប្លន់យកម៉ូតូ នៅសង្កាត់សាក់សំពៅ
ភ្នំពេញ៖ ប្រជាពលរដ្ឋប្រទះឃើញសពបុរសម្នាក់ដេកស្លាប់សង្ស័យជាករណីប្លន់សម្លាប់យកម៉ូតូ ៖ ហេតុការណ៍នេះបានបង្កការភ្ញាក់ផ្អើលកាលពីវេលាម៉ោង៦ព្រឹកថ្ងៃទី១៦ខែតុលាឆ្នាំ២០១៩ នៅចំណុចផ្លូវលំដីឡូត៍ ភូមិខ្វិត សង្កាត់សាក់សំពៅ ខណ្ឌដង្កោ ។
សពជនរងគ្រោះត្រូវបានគេស្គាល់ឈ្មោះ មែត ភីម ភេទប្រុសអាយុ២៨ឆ្នាំមុខរប ជាងឈើ ឆ្លៀតរត់ម៉ូតូឌុបបន្ថែម មានប្រពន្ធនិងកូន២នាក់ទាំងនៅក្នុងពោះ មានស្រុកកំណើត ភូមិកន្សោមអក ឃុំព្រៃខ្លា ស្រុកកោះអណ្ដែត ខេត្តតាកែវ ។
យោងតាមប្រភពព័ត៌មានពីប្រជាពលរដ្ឋដែលបានឃើញហេតុបានអោយដឹងថា នៅម៉ោងប្រហែល៦ព្រឹកគាត់បានចេញពីផ្ទះស្រាប់តែប្រទះឃើញជនរងគ្រោះដេកស្លាប់នៅផ្លូវក្បែផ្ទះ ភ្លាមៗគាត់បានរាយការណ៍ប្រាបទៅសមត្ថកិច្ចមូលដ្ឋានចុះមកពិនិត្យ។
បើតាមសម្ដីយុវជនម្នាក់ត្រូវជាប្អូនប្រុសរបស់ជនរងគ្រោះនិងអ្នករត់ម៉ូតូឌុបជាមួយបានឲ្យដឹងថា កាលពីវេលាម៉ោងប្រហែល៧យប់ថ្ងៃទី១៥ខែតុលាឆ្នាំ២០១៩ ជនរងគ្រោះបានឌុបម៉ូយចេញពីម្ដុំផ្សារសិនជូរី ហើយបានបាត់រហូតដល់ម៉ោង៨ជាងក្រុមគ្រួសារតេរកមិនចូលទើប ភ្ញាក់ផ្អើលឆោឡោតាមរកពេញមួយយប់តែមិនឃើញ ។
ប្រភពដ៏ដែលបានបន្តថាលុះព្រឹកឡើងក៏បានឃើញក្រុមអ្នកសារព័ត៌មានផ្សាយ នាំគ្នាមកមើលទើបដឹងថា សពជនរងគ្រោះជាបងរបស់ខ្លួន ព្រមទាំងបាត់ម៉ូតូម៉ាកហុងដាឌ្រីម ឆ្នាំ២០១៥មួយគ្រឿងផងដែរ ។
ក្រោយពេលកើតហេតុសមត្ថកិច្ចជំនាញចុះមកធ្វើកោសលវិច័យបញ្ចាក់ថា ជនរងគ្រោះត្រូវបានជនសង្ស័យចាក់ចំឆ្អឹងជំនីខាងឆ្វេង បណ្ដាលអោយស្លាប់ រួចបានធ្វើកំណត់ហេតុប្រគល់សពអោយទៅសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត ៕
