រថយន្តដឹកហ្គាសក្រុមហ៊ុន តារា ធី សុី ពន្លះរបាំងថ្មចែកទ្រូងផ្លូវបាក់៣កង់ សំណាងល្អមិនផ្ទុះឆេះ
ភ្នំពេញ៖ បុរសម្នាក់បើករថយន្ត ដឹកសុីទែនហ្គាស របស់ក្រុមហ៊ុន តារា ធី សុី ហ្គាស មួយគ្រឿងសង្ស័យ ងងុយដេក ត្រូវថយន្តរេចង្កូត បុករបាំងថ្មពុះចែកទ្រូងផ្លូវបាក់ចំនួន៣កង់ បណ្ដាលឲ្យរថយន្តគងជាប់និងរបាំងថ្មទៅមុខលេងរួច សំណាងល្អមិនផ្ទុះឆេះ
គ្រោះថ្នាក់ចរាចរណ៍ ដ៏ព្រឺព្រួចនេះបានកើតឡើងកាលពីវេលាម៉ោង២ និង៣០នាទីរំលងអាធ្រាត្រ ចូលថ្ងៃទី១៩ខែតុលាឆ្នាំ២០១៩ នៅតាមបណ្ដោយផ្លូវ២៧១ សង្កាត់ផ្សារដើមថ្កូវ ខណ្ឌចំការមន ។
យោងតាមប្រភពព័ត៌មានពីកន្លែងកើតហេតុបានអោយដឹងថា ដំបូងគេបានឃើញរថយន្តបង្ក ដែលដឹកសុីទែនហ្គាសដ៏ធំ មួយគ្រឿងពាក់ស្លាកលេខ ភ្នំពេញ 4A-4356 បើកបរដោយបុរសម្នាក់ ធ្វើដំណើរតាមបណ្ដោយផ្លូវលេខ២៧១ ទិសដៅពីត្បូងទៅជើងក្នុងល្បឿនយ៉ាងលឿន ខណៈមកដល់ចំណុចកើតហេតុសង្ស័យ តៃកុង ងងុយដេក ស្រាប់ រថយន្ត រេចង្កូតទៅបុករបាំងថ្មពុះចែងទ្រូងផ្លូវពេញទំហឹង បណ្ដាលឲ្យបាក់អស់ចំនួន៣កង់ ឯរថយន្តរងការខូចខាតផ្នែកខាងមុខយ៉ាងដំណំ កល់ជាប់របាំងថ្មទៅមុខលេងរួច តែសំណាងមិនផ្ទុះធុងហ្គាស ។
ក្រោយកើតហេតុ សមត្ថកិច្ច ជំនាញបានមកធ្វើការវាស់វែង យករថយន្តបង្កទៅរក្សាទុក នៅការិយាល័យចរាចរណ៍ រាជធានីភ្នំពេញរង់ចាំដោះស្រាយតាមច្បាប់ ៕
