សង្ស័យស្រវឹងស្រាខ្លាំងបើករថយន្តលឿនមិនប្រយត្ន័ជ្រុលចង្កូតបុករះចូលផ្ទះប្រជាពលរដ្ឋ២ខ្នងខូចខាតយ៉ាងដំណំ
ភ្នំពេញ៖ បុរសម្នាក់សង្ស័យស្រវឹងស្រាខ្លាំងទប់អារម្មណ៍លែងជាប់បើករថយន្តលឿនដូចហោះដល់ផ្លូវកោងមិនប្រយត្ន័ជ្រុលចង្កូតបុករះចូលផ្ទះប្រជាពលរដ្ឋ ២ខ្នងរងការខូចខាត
គ្រោះថ្នាក់ចរាចរណ៍ដ៏ព្រឺព្រួចនេះបានកើតឡើងកាលពីវេលាម៉ោង៣ និង៤០នាទីទៀបភ្លឺថ្ងៃទី៣១ខែតុលាឆ្នាំ២០១៩ នៅតាមបណ្ដោយផ្លូវ២៧១ទល់មុខវិទ្យាល័យ ជា ស៊ីម សាមគ្គី សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
សមត្ថកិច្ចបានឲ្យដឹងថា តៃកុងរថយន្តបង្កមានឈ្មោះ សូត្រ រតនៈ ភេទប្រុសអាយុ៣០ឆ្នាំ មានស្រុកកំណើតនៅភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្ដាល ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាកTACOMA ពណ៌ស ពាក់ស្លាកលេខភ្នំពេញ2BC-9834 បើកបរដោយបុរសម្នាក់ រួមដំណើរនិងបុរសម្នាក់ទៀត សង្ស័យស្រវឹងស្រា បានបើករថយន្តតាមបណ្ដោយផ្លូវ២៧១ទិសដៅពីជើងទៅត្បូងក្នុងល្បឿនយ៉ាងលឿន ខណៈមកដល់ចំណុចកើតហេតុស្ថានភាពផ្លូវកោង មិនបានប្រុងប្រយត្ន័ ក៏ជ្រុលចង្កូតទៅបុកដើមឈើ និងបន្តបុកចូលផ្ទះប្រជាពលរដ្ឋចំនួន២ផ្ទះបន្ថែមទៀតបណ្ដាលឲ្យបាក់រាយប៉ាយ ពេញផ្លូវ ចំណែករថយន្តបង្ករងការខូចខាតយ៉ាងដំណំ ។
ប្រភពបន្តថា សំណាងណាស់ករណីគ្រោះថ្នាក់ចរាចរណ៍ខាងលើនេះ មិនបណ្ដាលឲ្យអ្នកបើកបរ និង ម្ចាស់ផ្ទះ ឬ ប្រជាពលរដ្ឋរងរបួស គ្រាន់តែខូចខាតជញ្ជាំងផ្ទះនិងសំភារៈផ្សេងៗមួយចំនួនតែប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋាននិងសមត្ថកិច្ច ជំនាញបានចុះមកធ្វើការវាស់វែងយករថយន្តបង្ក និងអ្នកបើកបររទៅកាន់ការិយាល័យចរាចរណ៍ផ្លូវគោក រាជធានីភ្នំពេញ រង់ចាំដោះស្រាយតាមផ្លូវច្បាប់៕
