ជិះម៉ូតូឌុបគ្នាត្រូវរថយន្តដឹកប្រេងបុករួចកិនស្លាប់ម្នាក់និងម្នាក់ទៀតរងរបួសធ្ងន់
ភ្នំពេញ៖ យុវជនម្នាក់បានស្លាប់បាត់បង់ជីវិតគួរឲ្យអាណោចអធម៌ និងម្នាក់ទៀតរងរបួសធ្ងន់ ខណៈជិះម៉ូតូឌុបគ្គ្នាត្រូវរថយន្តដឹកប្រេងបុកចំពីមុខ និងកិនពីលើពេញទំហឹង
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើង កាលពីវេលាម៉ោង៦និង៤០នាទីយប់ថ្ងៃទី៣១ខែតុលាឆ្នាំ២០១៩ នៅតាមបណ្ដោយផ្លូវជាតិលេខ៤ ក្បែបុរីពិភពថ្មី ភូមិគុល សង្កាត់កំបូល ខណ្ឌកំបូល រាជធានីភ្នំពេញ ។
ជនរងគ្រោះ(ស្លាប់)មានឈ្មោះ តឿន រ័ត្ន
ភេទប្រុស អាយុ១៧ឆ្នាំ មុខរបរជាងពិដាន ស្នាក់នៅភូមិចំការថ្បែង សង្កាត់សំរោងក្រោម ខណ្ឌពោធិ៍សែនជ័យ មានស្រុកកំណើត ភូមិជ្រេស ឃុំជ្រេស ស្រុកកំពង់ត្រឡាច ខេត្តកំពង់ឆ្នាំង ។ ចំណែកម្នាក់ទៀតមិនបានទាន់ស្គាល់អត្តសញ្ញាណរងរបួសធ្ងន់ត្រូវរថយន្តសាមុយដឹកទៅព្យាបាលនៅមន្ទីរពេទ្យ ។
បើតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញយុវជនរងគ្រោះ២នាក់ជិះម៉ូតូមួយគ្រឿងម៉ាកហុងដាវេវ ពណ៍ខៀវ ស្លាកលេខ កំពង់ឆ្នាំង1F-9538 ជិះឌុបគ្នា តាមបណ្តោយផ្លូវជាតិលេខ៤ ទិសដៅពីលិចទៅកើតក្នុងល្បឿនល្មម ខណៈមកដល់ចំណុចកើត ហេតុខាងលើក៍មានរថយន្តដឹកប្រេងឥន្ធនៈមួយគ្រឿង ក្បាលពណ៌ស លាយខៀវ ឆ្នូតក្រហម ពាក់ស្លាកលេខ ភ្នំពេញ3D-7332 បើកបរដោយបុរសម្នាក់ ធ្វើដំណើរតាមបណ្តោយផ្លូវជាតិលេខ៤ទិស ដៅពីកើតទៅលិច បញ្រ្ចាស់គ្នា មិនប្រយត្ន័ លុះដល់ចំណុចកើតហេតុរថយន្តក៏រេចង្កូតជ្រុលទៅបុកម៉ូតូបណ្តាលឲ្យខ្ទាតយុវជនម្នាក់ដែលអង្គុយក្រោយចូលក្រោមកង់ រថយន្តខាងមុខកិនស្លាប់ភ្លាមៗយ៉ាងអាណោចអធម៌ ។ ចំណែកម្នាក់ទៀតជាអ្នកបើកម៉ូតូខ្ទាតចេញ ក្រៅរងរបួសធ្ងន់ ភ្លាមៗត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យ។
ប្រភពបន្តថា បន្ទាប់ពីបង្កហេតុភ្លាមៗ អ្នកបើកបររថយន្តព្យាមយាមបើកគេច តែត្រូវប្រជាពលរដ្ឋឃើញហេតុការដេញតាមចាប់បានប្រគល់អោយសមត្ថកិច្ច យកទៅសួរនាំ ។
ក្រោយមកសមត្ថកិច្ចមូលដ្ឋាននិងសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញដើម្បីកសាងសំណុំរឿងចាត់ការបន្តតាមផ្លូវច្បាប់។
ចំណែកសពជនរងគ្រោះសមត្ថកិច្ចធ្វើកំណត់ហេតុប្រគល់ឲ្យសាច់ញាតិយកទៅស្រុកធ្វើបុណ្យតាមប្រពៃណី៕
