រន្ធត់ណាស់! បុរសម្នាក់ត្រូវរថយន្តកុងទីន័របុករួចកិនស្លាប់យ៉ាងអាណោចអធម៌និងម្នាក់ទៀតរបួសធ្ងន់
ភ្នំពេញ៖ រថយន្តកុងទីន័របើកបត់ឆ្វេងឆ្លងផ្លូវមិនប្រយត្ន័ជ្រុលទៅបុកម៉ូតូ១គ្រឿង រួចក៏កិនបុរសម្នាក់ស្លាប់យ៉ាងអាណោចអធម៌ និងម្នាក់ទៀតរងរបួសធ្ងន់ហើយរថយន្តបើកគេចបាត់
គ្រោះថ្នាក់ចរាចរណ៍គួរឲ្យរន្ធត់នេះកើតឡើងកាលពីវេលាម៉ោង១២និង២០នាទីរំលងអាធ្រាត្រឈានចូលថ្ងៃទី០២ខែវិច្ឆិកាឆ្នាំ ២០១៩នៅចំណុចស្ពានដែកចំការដូងតាមបណ្តោយផ្លូវ២១៧កែងនិងផ្លូវ ៣៧១ ភូមិឫស្សី សង្កាត់ស្ទឹងមានជ័យ ២ ខណ្ឌមានជ័យ ។
សពជនរងគ្រោះ រួមទាំងអ្នករងរបួសធ្ងន់មិនទាន់ស្គាល់អត្តសញ្ញាណនៅឡើយទេ ដែលជិះម៉ូតូ១គ្រឿងម៉ាកហុងដាឌ្រីមស៊េរី ២០១៤ ពណ៌ខ្មៅ ស្លាកលេខកំពង់ចាម1D-2312 ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តកុងទីន័រមួយគ្រឿងមិនចាំស្លាកលេខបើកដោយបុរសម្នាក់ធ្វើដំណើរតាមណ្តោយផ្លូវ២១៧ទិសដៅពីជើងទៅត្បូងខណៈមកដល់ចំណុចកើតហេតុបានបត់ឆ្វេងឆ្លងទៅផ្លូវ ៣៧១ មិនបានប្រុងប្រយត្ន័ក៏ជ្រុលទៅបុកម៉ូតូ ហុងដាឌ្រីម ០១គ្រឿង ដែលជិះដោយបុរស២នាក់ធ្វើដំណើរបញ្ច្រាសទិសគ្នា រួចកិនបុរសម្នាក់ស្លាប់យ៉ាងអាណោចអាធ័ម និងម្នាក់ទៀតរងរបួសធ្ងន់ត្រូវបានរថយន្តសង្គ្រោះពេទ្យសួគ៌ាដឹកយកទៅព្យាបាល ។
ប្រភពដ៏ដែលបន្តថា ចំណែករថយន្តបង្កមិនបានឈប់ទទួលខុសត្រូវនោះទេ ហើយព្យាយាមបើកគេចបាត់ស្រម៉ោល។
ក្រោយពេលកើតហេតុសមត្ថកិច្ចមូលដ្ឋាននិងសមត្ថកិច្ចជំនាញចុះមក វាស់វែងយកម៉ូតូទៅរក្សាទុកបណ្ដោះអាសន្នរងចាំប្រគល់ជូនសាច់ញាតិវិញ។ ចំណែកសពជនរងគ្រោះសមត្ថកិច្ចបានធ្វើកំណត់ហេតុ រួចស្រាវជ្រាវទំនាក់ទំនងរកសាច់ញាតិមកទទួលយកទៅធ្វើបុណ្យតាមប្រពៃណី៕
