សូមប្រយត្ន័!!នគរបាលព្រហ្មទណ្ឌ បង្ក្រាបមុខសញ្ញាចោរលួចរថយន្ដឆ្លងដែនជនជាតិវៀតណាម ដែលប្រើពេលត្រឹម២-៣នាទីលួចរថយន្តបាន
(ភ្នំពេញ)៖ កម្លាំងនគរបាលព្រហ្មទណ្ឌកម្រិតធ្ងន់ ឃាត់ខ្លួនជនសង្ស័យដែលជា មុខសញ្ញាចោរលួចរថយន្ដជនជាតិវៀតណាមម្នាក់ បន្ទាប់ពីរូបគេបានធ្វើសកម្មភាពលួចរថយន្ដ Priusមួយគ្រឿងនៅភូមិស្វាយប៉ាក សង្កាត់ច្រាំងចំរេះ១ ខណ្ឌឫស្សីកែវ ។ ប្រតិបត្តិការបង្ក្រាបនេះធ្វើឡើងកាលពីថ្ងៃទី១១ ខែវិច្ឆិកា ឆ្នាំ២០១៩ នៅផ្លូវ៣៧០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យឈ្មោះ Phan Van Ho អាយុ២៩ឆ្នាំ ជនជាតិវៀតណាម កាន់លិខិតឆ្លងដែនលេខC4563131។
សមត្ថកិច្ចបន្តថា បើតាមចម្លើយសារភាពរបស់ជនសង្ស័យ បានឲ្យដឹងថា រូបគេពិតជាបានលួចរថយន្ដPrius ពណ៌ស ពាក់ស្លាកលេខភ្នំពេញ 2Y-8393 ពិតប្រាកដមែន។ ជនសង្ស័យបញ្ជាក់ទៀតថា សម្រាប់រថយន្ដប្រើប្រាស់ស្មាតឃី ចាប់ពីស៊េរីឆ្នាំ២០០៩ចុះក្រោម មិនពិបាកលួចនោះទេ ប្រើពេលត្រឹមតែ២នាទីប៉ុណ្ណោះ ព្រោះគេមានឧបករណ៍គ្រប់គ្រាន់ ទាំងឧបករណ៍ផ្ដាច់GPS និងឧបករណ៍ភ្ជាប់ជាមួយស្មាតឃី ដែលសម្ភារទាំងនេះគេយកមកពីប្រទេសវៀតណាម។
ក្រោយឃាត់ខ្លួនកម្លាំងសមត្ថកិច្ចជំនាញដកហូតបាន ដែកកាច់សោររថយន្ត១,ឧបករណ៍ ផ្តាច់ប្រព័ន្ធGPS ១គ្រឿង, ឧបករណ៍សម្រាប់ភ្ជាប់ជាមួយស្មាតឃី ១គ្រឿង,ដែកកាច់សោរសូឡិច០១ និងរថយន្តរបស់ជនរងគ្រោះ ម៉ាក Prius ពណ៌ស ពាក់ស្លាកលេខភ្នំពេញ 2Y-8393 មួយគ្រឿង ។
សមត្ថកិច្ចបញ្ជាក់ថា ជនសង្ស័យនេះ ជាមុខសញ្ញាគ្រោះថ្នាក់បំផុត ព្រោះគេមានមុខរបរជាងសោរ និងមានទាំងឧបករណ៍គ្រប់គ្រាន់ដើម្បីប្រើប្រាស់សម្រាប់ធ្វើសកម្មភាព ពិសេសការលួចរថយន្ដស្មាតឃីតែម្ដង ។
បច្ចុប្បន្ន ជនសង្ស័យ រួមនិងវត្ថុតាងត្រូវបានសមត្ថកិច្ចជំនាញកសាងសំណុំរឿង ដើម្បីបញ្ជូនទៅតុលាការផ្ដន្ទាទោសតាមច្បាប់៕
