សង្ស័យងោកបើករថយន្តបុកផ្លាកប៉ាន់ណូនិង បង្គោលភ្លើងបាក់មួយដើមទាំងព្រឹក
ភ្នំពេញ៖ បុរសម្នាក់បើករថយន្តស្ទួចសង្ស័យងងុយដេកងោកមួយភាំងរេចង្កូតទៅឆ្វេងបុកស្លាកប៉ាន់ណូនិងបង្គោលភ្លើង បណ្ដាលឲ្យរងរបួសធ្ងន់
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៩និង៤០នាទីព្រឹកថ្ងៃទី១៧ខែវិច្ឆិកាឆ្នាំ២០១៩ នៅចំណុចមុខការ៉ាសសាំង សូគីមិច តាមបណ្ដោយផ្លូវ៣៧១ ភូមិម័រ សង្កាត់ដង្កោ ខណ្ឌដង្កោ ។
យោងតាមប្រភពព័ត៌មាននៅកន្លែងកើតហេតុ បានអោយដឹងថា ដំបូងគេឃើញរថយន្ត បង្កប្រភេទស្ទួចខៀវ ពាក់ស្លាកលេខភ្នំពេញ3B-7310 បើកបរដោយបុរសម្នាក់ធ្វើដំណើរតាមបណ្ដោយផ្លូវ៣៧១ទិសដៅពីកើតទៅលិច ខណៈមកដល់ចំណុចសង្ស័យតៃកុង ងោកមួយភាំងស្រាប់តែរេចង្កូតមកខាងឆ្វេងឆ្លងផ្លូវជ្រុលទៅបុកផ្លាកប៉ាន់ណូនៅមុខផ្ទះប្រជាពលរដ្ឋបាក់អស់មួយផ្ទាំងរួចបន្តទៅបុកបង្គោលភ្លើងបាក់មួយដើមទៀតធ្វើឲ្យរថយន្តគាប់ជាប់ទៅលែងរួច បណ្ដាលឲ្យអ្នកបើកបររងរបួសធ្ងន់ ភ្លាមៗត្រូវបានរថយន្តសាមុយ របស់គ្លីនិច ឯកជន សួគ៌ាដឹកយកទៅព្យាបាល ។
ក្រោយកើតហេតុសមត្ថកិច្ចមូលដ្ឋាននិងសមត្ថកិច្ចជំនាញ បានចុះមកវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ រងចាំដោះស្រាយតាមនិតិវិធីច្បាប់ ៕
