បើករថយន្តបុករបាំងថ្មចែកផ្លូវ ក្រឡាប់ផ្ងាជើងរួចឡើងជិះរថយន្តមួយគ្រឿងទៀតគេចខ្លួនបាត់
ភ្នំពេញ បុរសម្នាក់សង្ស័យស្រវឹងស្រាខ្លាំងធ្លាក់ភ្នែក បើករថយន្តលឿនមិនប្រយត្ន័បានជ្រុលទៅបុករបាំងថ្មពុះចែកទ្រូងផ្លូវ ក្រឡាប់ផ្ងាជើងច្រង៉ាង
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០២និង១០នាទីរំលងអធ្រាត្រ ឈានចូលថ្ងៃទី១៨ ខែវិឆ្ឆិកា ឆ្នាំ២០១៩ នៅចំណុចមុខស្ថានទូតវៀតណាមតាមបណ្ដោយផ្លូវព្រះមនីវង្ស ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។
យោងតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាកឡិចស៊ីស RX300ពណ៌ស ពាក់ស្លាកលេខភ្នំពេញ2AL-0313 បើកបរដោយបុរសម្នាក់ សង្ស័យស្រវឹងស្រាជោគជាំ ធ្វើដំណើរតាមបណ្ដោយផ្លូវព្រះមនីវង្ស ទិសដៅពីជើងទៅត្បូងក្នុងល្បឿនយ៉ាងលឿនខ្វះការប្រុងប្រយត្ន័ លុះមកដល់ចំណុចកើត ហេតុបានជ្រុលចង្កូតទៅបុករបាំងថ្មពុះចែកទ្រូងផ្លូវ ពេញទំហឹង បណ្ដាលឲ្យរថយន្តក្រឡាប់ផ្ងាជើងឡើងលើ អ្នកបើកបរជាប់ក្នុងកាប៊ីនរថយន្ត ស្រែកឲ្យគេជួយ ។
ប្រភពបានបន្តថា ភ្លាមៗនោះប្រជាពរដ្ឋដែលធ្វើដំណើរតាមផ្លូវឃើញដូច្នេះ ក៏វាយ កញ្ចក់រថយន្ត បំបែករួចទាញ ម្ចាស់ចេញមកខាងក្រៅ សំណាងរងរបួសស្រាល ហើយក៏បានហៅរថយន្តមួយគ្រឿងទៀត ជិះចេញទៅបាត់ដោយទុករថយន្តបង្កចោល ។
ក្រោយពេលកើតហេតុសមត្ថកិច្ចមូលដ្ឋាននិងជំនាញបានមកវាស់វែងស្ទូចរថយន្តបង្កយកទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ រងចាំឲ្យម្ចាស់ចូលខ្លួនដោះស្រាយតាមផ្លូវច្បាប់នៅពេលក្រោយ ៕
