សមត្ថកិច្ចឃាត់ខ្លួនជនសង្ស័យប្រុសស្រី៣នាក់ជាមុខសញ្ញាចែកចាយគ្រឿងញៀន
ស្វាយរៀង៖ កម្លាំង កងរាជអាវុធហត្ថក្រុងបាវិត បង្រ្កាបករណីរក្សាទុកនិងចែកចាយជួញដូរគ្រឿងញៀនដោយខុសច្បាប់ ឃាត់ខ្លួនជនសង្ស័យ ជាបន្តបន្ទាប់បានចំនួន៣នាក់
ប្រតិបត្តិការណ៍បង្ក្រាបនេះដឹកនាំកម្លាំងដោយ លោក វរសេនីយ៍ទោ ខាំ ណាន មេបញ្ជាការ កងរាជអាវុធហត្ថក្រុងបាវិត ដែលធ្វើឡើងកាលពីវេលាម៉ោង០៤និង១០នាទីរសៀលថ្ងៃទី១៥ខែវិច្ឆិកាឆ្នាំ២០១៩ នៅចំណុចភូមិព្រៃធំ សង្កាត់ព្រៃអង្គុយ ក្រុងបាវិត ខេត្តស្វាយរៀង ។
សមត្ថកិច្ចបានអោយដឹងថា ជនសង្ស័យទី០១៖ មានឈ្មោះ អ៊ែល ស្រីពៅ ភេទស្រី អាយុ ២៣ ឆ្នាំ ជនជាតិខ្មែរ មុខរបររត់ តុហាងចិន មានទីលំនៅភូមិកក់ ឃុំស្វាយរំពារ ស្រុកស្វាយទាប ខេត្តស្វាយរៀង ។
ទី០២៖ ឈ្មោះ ឡេង ផល្លា ភេទប្រុស អាយុ ៣៣ ឆ្នាំ មានទីលំនៅភូមិចុងព្រែក សង្កាត់ស្វាយរៀង ក្រុង និងខេត្តស្វាយរៀង និងទី៣៖ មានឈ្មោះ សំ ស៊ីណាត ភេទប្រុស អាយុ ៣៨ ឆ្នាំ មានទីលំនៅភូមិប្រសូត្រ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបន្តថា ចំពោះ វត្ថុតាងដកហូតមានម្សៅក្រាមពណ៌សថ្លាចំនួន១៦កញ្ចប់,ថ្នាំគ្រាប់ពណ៌ផ្កាឈូកចំនួន០៩គ្រាប់,ទូរស័ព្ទចំនួន ១១គ្រឿង,ម៉ូតូចំនួន០៣គ្រឿង,ប្រាក់រៀលចំនួន៣៩៦.៥០០ រៀល,ប្រាក់ដុល្លារចំនួន០១ ដុល្លារ, កាតវីងចំនួន០១សន្លឹក,ជញ្ជីងសម្រាប់ថ្លឹងគ្រឿងញៀន១គ្រឿង,លោហធាតុពណ៌លឿង១ ខ្សែ,ថង់សម្រាប់ច្រកគ្រឿងញៀនមួយចំនួននិងសម្ភារៈប្រើប្រាស់គ្រឿងញៀនមួយចំនួនទៀត។
បច្ចុប្បន្ន ជនសង្ស័យទាំង៣នាក់រួមនិងវត្ថុតាង កម្លាំងសមត្ថកិច្ចជំនាញបានកសាងសំណុំរឿងដើម្បីបញ្ជួនទៅតុលាការចាត់ការបន្តតាមច្បាប់ ៕
