បើកបរសូមឲ្យមានការប្រុងប្រយត្ន័ទាំងអស់គ្នា
ភ្នំពេញ ៖ បុរសម្នាក់បើករថយន្តលឿនដូចហោះមិនប្រុងប្រយត្ន័ជ្រុលទៅបុកឃឿនសួនច្បារចែកផ្លូវក្រឡាប់ផ្ងាជើង
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០២និង៣០នាទីរំលងអាធ្រាត្រឈានចូលថ្ងៃទី២៣ខែវិច្ឆិកាឆ្នាំ២០១៩ នៅតាមបណ្ដោយផ្លូវសហព័ន្ធរុស្សុី ត្រង់ចំណុចមុខទីស្ដីការគណៈរដ្ឋមន្ត្រី ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តមួយគ្រឿងម៉ាក ឡិចសុីសRX300 ពណ៌ស្ក ពាក់ស្លាកលេខភ្នំពេញ2AG-6714 បើកបរដោយបុរសម្នាក់ និងមានអ្នកដំណើរជាមួយ២ទៅ៣នាក់ ទៀតដោយធ្វើដំណើរតាមបណ្ដោយផ្លូវសហព័ន្ធរុស្សុី ទិសដៅពីលិចទៅកើតក្នុងល្បឿនយ៉ាងលឿន លុះមកដល់ចំណុចកើតហេតុស្រាប់តែរេចង្កូតមកស្ដាំ ជ្រុលទៅបុកឃឿនសួនច្បារចែកទ្រូងផ្លូវ បណ្ដាលឲ្យក្រឡាប់ផ្ងារជើងឡើង រីឯអ្នកបើកបរនិងអ្នករួមដំណើរ រងរបួសរលាត់ខ្លួនប្រាណតិចតួច ។
ក្រោយកើតហេតុ សមត្ថកិច្ចមូលដ្ឋាន និងជំនាញចុះធ្វើការវាស់វែងយករថយន្តបង្កទៅ រក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយតាមច្បាប់ នៅពេលក្រោយ ៕ 
