បន្លំខ្លួនជាសមត្ថកិច្ចជិះម៉ូតូស្ទាក់ចាប់ពលរដ្ឋតាមផ្លូវត្រូវនគរបាលខណ្ឌពោធិសែនជ័យចាប់វាយខ្នោះ
ភ្នំពេញ៖ បុរសជាជនសង្ស័យម្នាក់ត្រូវកម្លាំងនគរបាលប៉ុស្តិ៍ចោមចៅ៣ ឃាត់ខ្លួនយកមកសួរនាំ បន្ទាប់ពីជនសង្ស័យរូបនោះ ពាក់ឯកសណ្ឋានបន្លំខ្លួនជាមន្ត្រីនគរបាលពាក់សក្ក័៣ ហើយបានជិះម៉ូតូ១គ្រឿងធ្វើសកម្មភាពស្ទាក់ចាប់ យុវជនម្នាក់កំពុងជិះម៉ូតូនៅតាមផ្លូវ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ច
ហេតុការណ៍នេះបានកើតឡើងកាលពីវេលាម៉ោង១២និង៣០នាទីរំលងអធ្រាតឈានចូលថ្ងៃទី២៧ខែវិឆ្ឆិកាឆ្នាំ២០១៩ នៅតាមបណ្ដោយផ្លូវជាតិលេខ៤ ត្រង់ចំនុចបុរីសែនមនោរម្យ ក្នុងសង្កាត់ចោមចៅ៣ ខណ្ឌពោធិ៍សែនជ័យ ។
សមត្ថកិច្ចបានប្រាប់ឲ្យដឹងថា ជនសង្ស័យដែលបន្លំខ្លួនធ្វើជាសមត្ថកិច្ចមានឈ្មោះ ទូច ដាវីត ភេទប្រុសអាយុ ២៧ឆ្នាំមុខរបរមិនពិតប្រាកដ ស្នាក់នៅក្នុងសង្កាត់ទួលទំពូង ខណ្ឌចំការមន។
ចំណែកជនរងគ្រោះមានឈ្មោះ ជា សុផាណាត់ ភេទប្រុស អាយុ២៤ឆ្នាំ មុខរបកម្មកររោងចក្រ ស្នាក់នៅម្តុំវត្តអង្គ ខណ្ឌពោធិ៍សែនជ័យ។
បើតាមសម្ដី ជនរងគ្រោះបានឲ្យដឹងថា មុនពេលកើតហេតុរូបគាត់បានជិះម៉ូតូ ០១គ្រឿងម៉ាក និច ពណ៌ស ពាក់ស្លាកលេខភ្នំពេញ1FE-1609 ចេញពីម្ដុំរង្វល់មូលចោមចៅ ដោយធ្វើដំណើរតាមបណ្ដោយផ្លូវជាតិលេខ៤ទិសដៅពីកើតទៅលិច លុះមកដល់ចំណុចកើតហេតុខាងលើស្រាប់តែមានបុរសម្នាក់ស្លៀកពាក់ ឯសណ្ឋានជានគរពាក់សក្ក័៣ជិះម៉ូតូឌ្រីមសង់០១៤ ពណ៌ខ្មៅ ពាក់ស្លាកលេខភ្នំពេញ1CU-9499 ជិះមកពីក្រោយស្របគ្នាមកកាក់ម៉ូតូរបស់គាត់ឲ្យឈប់រួចបានធ្វើសកម្មភាពឆែកឆេរ ម៉ូតូរបស់គាត់ដោយមិនមានឃើញអី ស្រាបតែជនសង្ស័យប្រាប់ថាយកទៅខណ្ឌតែមិនដឹងថាត្រូវខណ្ឌណាទេ។
-ប្រភពដដែរបានបន្តទៀតថា ភ្លាមៗនោះជនសង្ស័យប្រាប់ថា យករូបគាត់ទៅពិនិត្យទឹកនោម តែគាត់ប្រកែកមិនទៅទើបបង្កឲ្យមានការភ្ញាក់ផ្អើលដល់បងប្អូនប្រជាពរដ្ឋធ្វើដំណើរតាមដងផ្លូវ មកចោមរោមមើល និងបានសួរទៅបុរសដែលអះអាងថា សមត្ថកិច្ចសក្ត័៣ នោះតែរូបគេមិនឆ្លើយតបសោះ។ បន្ទាប់មកប្រជាពលរដ្ឋបានរាយការណ៍ទៅសមត្ថកិច្ចឲ្យចុះមកជួយអន្តរាគមន៍នៅកន្លែង កើតហេតុ ហើយភ្លាមៗនោះកម្លាំងសមត្ថកិច្ចក៏បានឃាត់ខ្លួនបុរសជាជនសង្ស័យដែលបន្លំខ្លួនជាសមត្ថកិច្ច និងនាំយុវជនរងគ្រោះខាងលើមកប៉ុស្តិ៍ នគរបាលចោមចៅ៣ ដើម្បីសួរ នាំ ខណៈពេលកំពុងសាកសួរ បុរស ដែលតាំងខ្លួនជា នគរបាល នោះបានឆ្លើយសារភាពថាខ្លួនពិតជាក្លែងបន្លំធ្វើជាសមត្ថកិច្ច ពិតប្រាកដមែន ហើយខោអាវពាក់ជាប់និងខ្លួននេះ គឺទិញពីផ្សារទឹកថ្លា ព្រោះតែស្រលាញ់ខោអាវ ប៉ូលិស ពេក ។
ក្រោយមក ជនសង្ស័យដែលក្លែងខ្លួនធ្វើជាសមត្ថកិច្ចត្រូវបាននគរបាលប៉ុស្តិ៍ចោមចៅ៣ ឃុំខ្លួនបណ្ដោះអាសន្ន ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌពោធិ៍សែនជ័យ ចាត់ការបន្តតាមនិតិវិធីច្បាប់។
