ក្រុមចោរភ្ជង់ប្លន់ស្ត្រីម្នាក់យកម៉ូតូស្កុបពីបានសម្រេចទាំងព្រឹកនៅខណ្ឌពោធិសែនជ័យ មិនរំខានដល់សមត្ថកិច្ច
ភ្នំពេញ៖ ស្ត្រីម្នាក់ត្រូវបានក្រុមជនសង្ស័យជាចោរ២នាក់ដកកាំភ្លើងភ្ជង់ប្លន់យកម៉ូតូម៉ាកហុងដា ស្កុបពី បានសម្រេចទាំងព្រឹករួចនាំគ្នាជិះគេចខ្លួនបាត់ស្រមោល
ហេតុការណ៍បង្កឲ្យមានការភ្ញាក់ផ្អើលនេះបានកើតឡើងកាលពីវេលាម៉ោង៧ព្រឹកថ្ងៃទី២៧ខែវិច្ឆិកាឆ្នាំ២០១៩នៅត្រង់ចំនុចម្តុំកន្លែងលក់ទឹកត្នោតជូ តាមបណ្ដោយផ្លូវលំ ភូមិទួលពង្រសង្កាត់ចោមចៅទី១ ខណ្ឌពោធិសែនជ័យរាជធានីភ្នំពេញ។
ស្ត្រីរងគ្រោះមានឈ្មោះ ឡាយ ពៅ អាយុ៣៨ ឆ្នាំមុខរបរលក់កាហ្វ ស្នាក់នៅម្តុំទីតាំងកើតហេតុ ។
បើយោងតាមសម្តីស្ត្រីរងគ្រោះបានរៀបរាប់ទាំងទឹកភ្នែករលីងរលោង និងមានការសោកស្តាយម៉ូតូដែលទើបនិងទិញមកបានមួយសប្តាហ៏ ហើយទើបយកទៅកិបស្លាកលេខបានមួយថ្ងៃត្រូវក្រុមចោរប្លន់យកទៅបាត់នោះបានអោយដឹងថា មុនពេលកើតហេតុរូបគាត់បានជិះម៉ូតូមួយគ្រឿងម៉ាក ស្គុបពី សេរីឆ្នាំ២០២០ពណ៍ក្រហមពាក់ស្លាកលេខភ្នំពេញ1HI-5464 យកបាយទៅអោយម្តាយរបស់គាត់នៅម្តុំបន្ទាយរថពាសដែកទួលពង្រពេលដែលយកបាយអោយម្ដាយរួចហើយរូបគាត់ក៏បានជិះម៉ូតត្រលប់មកវិញ ក៏ស្រាប់តែមានជនសង្ស័យ២នាក់ជិះម៉ូតូមួយគ្រឿងតាមមកពីក្រោយរហូត តែគាត់មិនចាប់អារម្មណ៍ លុះមកដល់កន្លែងផ្លូវស្ងាត់ស្រាប់តែជនសង្ស័យម្នាក់បានដកកាំភ្លើងខ្លីពុំស្គាល់ម៉ាកភ្ជង់គាត់រួចប្លន់យកម៉ូតូ នាំគ្នាជិះគេចខ្លួនបាត់ស្រមោលដោយសុវត្ថភាព មិនរំខានដល់សមត្ថកិច្ចនគរបាល ខណ្ឌពោធិសែនជ័យ នោះឡើយ។
ក្រោយពេលកើតហេតុស្ត្រីរងគ្រោះបានត្រឹមតែឈរ ធ្វើមុខ ស្រឡាំងកាំង ស្ដាយម៉ូតូដែលខំសន្សំលុយទិញត្រូវចោរប្លន់យកបាត់ បន្ទាប់មកគេឃើញសមត្ថកិច្ចមូលដ្ឋានបានត្រឹមតែចុះមកសួរនាំនិងដឹកយកស្ត្រីរងគ្រោះទៅអោយដាក់ពាក្យបណ្តឹងនៅប៉ុស្តិនគរបាលរដ្ឋបាលសង្កាត់ចោមចៅទី១តែប៉ុណ្ណោះ ៕
