រថយន្តក្រុមហុ៑ន Avacas បើកឡើងចំណោតមិនរួចរអិលថយក្រោយកិនម៉ូតូពីរគ្រឿងរុញផ្ទប់នឹងជញ្ជាំងផ្ទះប្រជាពលរដ្ឋ

ភ្នំពេញៈ រថយន្តក្រុមហុ៑ន Avacas បានបើកឡើងចំណោតមិនរួចហើយជាន់ហ្វ្រាំងមិនសុីបានរអិលថយក្រោយមកកិនពីលើកម៉ូតូ២គ្រឿងរងការខូចខាតហើយបានរុញផ្ទប់ទៅនឹងជញ្ជាំងផ្ទះប្រជាពលរដ្ឋ សំណាងល្អដែលមិនប៉ះពាល់ដល់មនុស្ស ដោយហេតុការណ៍នេះបានកើតឡើងកាលពីវេលាម៉ោង ៩នឹង២០នាទីព្រឹកថ្ងៃទី ២៨ ខែវិច្ចិកា ឆ្នាំ២០១៩ ស្ថិតនៅចំណុចចំណោត ក្លោងទ្វារវត្តពោធិញាណ ភូមិឬស្សី សង្កាត់ស្ទឹង មានជ័យ២ ខណ្ឌមានជ័យ រាជធានីភ្នំពេញ ។

តាមប្រភពព័ត៌មានពីប្រជាពលរដ្ឋបានអោយដឹងថា មុនពេលកើតហេតុរថយន្តបង្កម៉ាក ហុីយ៉ាន់ដាយ ដឹកទំនិញរបស់ក្រុមហុ៑ន Avacas បានធ្វើដំណើរតាមផ្លូវបេតុងទិសដៅពីជើងទៅត្បូង ខណៈមកដល់ចំណុចកើតហេតុដែលជាកន្លែងចំណោត រថយន្តប្រឹងបើកឡើងទៅផ្លូវ៣៧១ ប៉ុន្តែឡើងមិនរួចក៏រអិលថយក្រោយ កិនពីលើម៉ូតូ សេ១២៥ មួយគ្រឿង នឹងម៉ូតូ PCX មួយគ្រឿងទៀត ហើយបន្តរអិលបុកបង្គោលស្លាកសញ្ញានឹងកិនម៉ាសុីនខ្យល់ រុញផ្ទប់ជាមួយនឹងជញ្ជាំងផ្ទះប្រជាពលរដ្ឋកល់ជាប់ទៅមុខលែងរួច ។

សមត្ថកិច្ចបានអោយដឹងថាក្នុងហេតុការណ៍នេះមិនមានអ្នករង់របួសទេ ដោយសារពេលកើតហេតុម្ចាស់ម៉ូតូបានលោតចេញពីម៉ូតូទាន់ពេល ប៉ុន្តែបណ្តាលអោយម៉ូតូនឹងរថយន្តបង្ករួមជាមួយសម្ភារមួយចំនួនត្រូវរងការខូចខាត ។ សមត្ថកិច្ចបន្តថាក្រោយកើតហេតុម្ចាស់រថយន្តបង្កបានសម្របសម្រួលជាមួយម្ចាស់ម៉ូតូនឹងម្ចាស់ផ្ទះ សុំចេញសងថ្លៃខូចខាតទាំងអស់ដើម្បីបញ្ចប់រឿង។

គួរបញ្ជាក់ថាកាលពីប៉ុន្មានខែមុន នៅត្រង់ចំណុចនេះក៏ធ្លាប់មានករណីរថយន្តរអិលកិនម៉ូតូនឹងកិនមនុស្សស្លាប់ផងដែរ ដូច្នេះសូមបងប្អូនបើកបរត្រូវមានការប្រុង ប្រយ័ត្នអោយបានច្រើនពេលមកដល់ចំណុចនេះ៕