សង្ស័យស្រវឹងស្រាបើករថយន្តតម្លៃរាប់មុឺនដូល្លារបុករបាំងថ្ម ចែកផ្លូវក្រឡាប់ឆ្លងចរន្តប្រពន្ធ័ភ្លើងឆេះផ្អើល
ភ្នំពេញ៖ នារីស្រស់ស្អាតម្នាក់សង្ស័យស្រវឹងស្រាបានបើករថយន្តស៊េរីទំនើប ម៉ាកបេលី មួយគ្រឿងមានតម្លៃរាប់សិបមុឺនដូល្លារេចង្កូតជ្រុលទៅបុករបាំងថ្ម ពុះចែកទ្រូងផ្លូវក្រឡាប់ផ្ងារជើង និងឆ្លងចរន្តភ្លើងចេញជាផ្សែងហុយខ្មួលខ្មាញ់ផ្អើលដល់សមត្ថកិច្ចចេញរថយន្តពន្លត់អគ្គីភ័យ១គ្រឿងមកអន្តរាគមន៍បាញ់ទឹកពន្លត់ទាន់ពេលវេលា
ហេតុការណ៍គ្រោះថ្នាក់ចរារណ៍នេះបានបង្កការភ្ញាក់ផ្អើលកាលពីវេលាម៉ោង០១និង ៣០នាទីរំលងអាធ្រាត ឈានចូលថ្ងៃទី០១ ខែធ្នូ ឆ្នាំ២០១៩ នៅត្រង់ចំណុចស្តុបក្តាន់ពីរ តាមបណ្ដោយផ្លូវសហព័ន្ធរុស្ស៊ី សង្កាត់ស្រះចក ខណ្ឌដូនពេញ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តស៊េរីទំនើប ១គ្រឿងម៉ាក បេលី ពណ៌ ស្លាទុំ ពាក់ស្លាកលេខភ្នំពេញ2AY-5666 បើកបរដោយនារីស្រស់ស្អាតម្នាក់ធ្វើដំណើរតាមបណ្ដោយផ្លូវសហព័ន្ធរុស្សុី ទិសដៅពីកើតទៅលិច ក្នុងល្បឿនលឿនសង្ស័យមិនបានប្រុងប្រយត្ន័ ខណៈមកដល់ចំណុចកើតហេតុខាងលើរថយន្តបានរេចង្កូតទៅឆ្វេងដៃរួចក៏ជ្រុលទៅបុករបាំងថ្ម ពុះចែកទ្រូងផ្លូវបណ្ដាលឲ្យបាក់១កង់ ឯរថយន្តក្រឡាប់ ផ្ងារជើងទ្រមេឃ និងដាច់កង់ម្ខាង ព្រមទាំងខ្ទេចផ្នែកខាងមុខខូចខាតយ៉ាងដំណំ ។
ប្រភពបានបន្តថា ភ្លាមៗនោះគេឃើញនារីរូបស្រស់បានលូនចេញពីរថយន្តតែមិនមានការរងរបួសនោះទេ! តែរថយន្តបានឆ្លងចរន្តប្រពន្ធ័ភ្លើងចេញជាផ្សែងហុយខ្មួលខ្មាញ់ បង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចេញរថយន្តពន្លត់អគ្គីភ័យ ១គ្រឿងមកអន្តរាគមន៍ជួយបាញ់ទឹកទាន់ពេលវេលាការពារខ្លាចកើតទៅជាអគ្គីភ័យកើតឡើង ។
ក្រោយពេលកើតហេតុ គេឃើញសាច់ញាតិបងប្អូននារីដែលជាអ្នកបើកបរមកនាំរូបនាងចេញពីកន្លែងកើតហេតុ ។ បន្ទាប់មកសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញមកវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំដោះស្រាយគ្នាទៅតាមផ្លូវច្បាប់៕
