បើកម៉ូតូសណ្ដោងរឺម៉ករេចង្កូតបុកម៉ូតូហុងដាឌ្រីម បណ្ដាលឲ្យស្លាប់បុរសម្នាក់
ភ្នំពេញ៖ បុរសម្នាក់បើកម៉ូតូសណ្ដោងរឺម៉កមិនប្រយ័ត្នរេចង្កូតទៅបុកជាមួយម៉ូតូហុងដាឌ្រីមមួយគ្រឿងជិះដោយបុរសម្នាក់បណ្ដាលឲ្យបោកក្បាលស្លាប់ភ្លាមៗនៅនឹងកន្លែង
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៨និង៣០នាទីយប់ថ្ងៃទី៣០ ខែវិច្ចិកាឆ្នាំ២០១៩ ស្ថិតនៅតាមបណ្ដោយផ្លូវជាតិលេខ២ ក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ។
សពជនរងគ្រោះមានឈ្មោះ ព្រំ សុីដេត ភេទប្រុស អាយុ ៣១ឆ្នាំ មុខរបរវិស្វករ មានស្រុកកំណើត ភូមិរលួស ឃុំតាំងយ៉ាប ស្រុកព្រៃ កប្បាស ខេត្តតាកែវ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើកម៉ូតូសណ្ដោងរឺម៉កមួយគ្រឿង តាមបណ្ដោយផ្លូវជាតិលេខ២ ទិសដៅពីកើតទៅលិច ខណៈមកដល់ចំណុចកើតហេតុខាងលើបានរេចង្កូតទៅខាងឆ្វេងដៃជ្រុលទៅបុកម៉ូតូមួយគ្រឿងម៉ាកហុងដាឌ្រីមស៊េរីឆ្នាំ២០១៤ ពណ៌ខ្មៅ ពាក់ស្លាកលេខភ្នំពេញ1CD-6123ជិះដោយបុរសម្នាក់ទិសដៅបញ្ច្រាស់គ្នាចំពីមុខពេញទំហឹងបណ្ដាលឲ្យភាគីខាងម៉ូតូដួលបោកក្បាលស្លាប់ភ្លាមៗនៅនឹងកន្លែងកើតហេតុ ។ ចំណែកឯម្ចាស់ម៉ូតូសណ្តោងរឺម៉កត្រូវបានប្រជាពលរដ្ឋ ឃាត់ខ្លួនរួចប្រគល់ជូនសមត្ថកិច្ចយកមកប៉ុស្តិ៍នគរបាលរដ្ឋបាលសង្កាត់ព្រែកកំពិសដើម្បីសួរនាំនិងប្រគល់ឲ្យសមត្ថកិច្ចជំនាញចរាចរណ៍ក្រុង ។
ក្រោយកើតហេតុ សមត្ថកិច្ចជំនាញចុះមកវាស់វែងយកម៉ូតូសណ្តោងរឺម៉ក និងម៉ូតូជនរងគ្រោះទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញដើម្បីកសាងសំណុំរឿងចាត់ការតាមផ្លូវច្បាប់។
ចំណែកសពជនរងគ្រោះត្រូវសមត្ថកិច្ចធ្វើកំណត់ហេតុរួចប្រគល់ជូនសាច់ញាតិយកទៅធ្វើបុណ្យតាមប្រពៃណី៕
