កម្លាំងនគរបាលខេត្តតាកែវ ក្របួចមុខសញ្ញាចោរលួចនិងប្លន់បាន២នាក់
ខេត្តតាកែវ ៖ ក្រោយពីបានកំណត់មុខសញ្ញា និងស្រាវជ្រាវយ៉ាងម៉ត់ចត់ តាមគោលការដឹកនាំរបស់ឯកឧត្តម ឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ ចំពោះមុខសញ្ញាលួច ឆក់ ប្លន់ក្នុងមូលដ្ឋាន នៅថ្ងៃទី១៨ខែធ្នូ ឆ្នាំ២០១៩វេលាម៉ោង១០និង៣០នាទីព្រឹកកម្លាំងជំនាញអធិការដ្ឋាននគរបាលស្រុកត្រាំកក់ បានឃាត់ខ្លួនជនសង្ស័យចំនួន០២នាក់ ពាក់ព័ន្ធករណីអំពើលួច(ម៉ូតូ)។
សមត្ថកិច្ចឲ្យដឹងថា ជនសង្ស័យដែលឃាត់ខ្លួនទី០១៖ មានឈ្មោះ សៀង កុសល ភេទប្រុស អាយុ៣០ឆ្នាំ រស់នៅភូមិរមុន ឃុំបឹងត្រាញ់ខាងជើង ស្រុកសំរោង ខេត្តតាកែវ (មុខសញ្ញាកាច់សោម៉ូតូ) ឃាត់ខ្លួនខណៈពេលជិះម៉ូតូមួយគ្រឿងម៉ាកស៊ុយស៊ុយគីនិច ដើរលក់ដោយគ្មានឯកសារ នៅត្រង់ចំណុចភូមិខ្លាគ្រហ៊ឹមឃុំតាភេម ស្រុកត្រាំកក់ ។
ជនសង្ស័យទី២៖ មានឈ្មោះ ឡាយ សុភាព ភេទប្រុស អាយុ៤៧ឆ្នាំ រស់នៅភូមិដំណាក់ហ្លួង ឃុំជំរះពេន ស្រុកសំរោង ឃាត់ខ្លួននៅចំណុចភូមិត្រពាំងវែង ឃុំបឹងត្រាញ់ខាងត្បូង ស្រុកសំរោង (មុខសញ្ញាកាច់សោម៉ូតូ) ដែលមុខសញ្ញាខាងលើមានដីការចាប់ខ្លួនផងដែរពាក់ព័ន្ធករណីលួចមានស្ថានទម្ងន់ទោស(ប្លន់ប្រដាប់អាវុធ)ប្រព្រឹត្តនៅឃុំបឹងត្រាញ់ខាងជើង ស្រុកសំរោង កាលពីថ្ងៃទី២៥ ខែធ្នូ ឆ្នាំ២០០១ ហើយបានរត់គេចខ្លួនរហូតដល់បច្ចុប្បន្ន ។
ក្រោយឃាត់ខ្លួន កម្លាំងនគរបាលជំនាញបានដកហូតវត្ថុតាងរួមមាន៖ ម្សៅក្រាមពណ៌សថ្លា ០១កញ្ចប់ -ទូរស័ព្ទដៃ ០២គ្រឿង -ម៉ូតូ០២គ្រឿង -ផ្លាកលេខម៉ូតូចំនួន ០៣ផ្លាកនិងសម្ភារមួយចំនួនទៀត ។ បច្ចុប្បន្នជនសង្ស័យនិងវត្ថុតាងត្រូវបានសមត្ថកិច្ចកសាងសំណុំរឿងចាត់ការបន្តតាមនីតិវិធីច្បាប់៕
