ស្ត្រីម្ចាស់ហាង សំណាងអាណេ ដែលខ្មាន់កាំភ្លើងជាអធិការរងក្រុងបាវិតបាញ់ឲ្យរបួសធ្ងន់ ពេលនេះស្លាប់ហើយ
ស្វាយរៀង៖ យោងតាមប្រភពព័ត៌មានដែលបានរាយការបន្ថែមមកថា ស្ត្រីរងគ្រោះជាម្ចាស់ ហាង សំណាងអាណេ ស្ថិតក្នុងភូមិតាពៅ សង្កាត់បាវិត ក្រុងបាវិត ខេត្តស្វាយរៀង ដែលកូនប្រុសលោកអធិការដ្ឋាននគរបាលក្រុងបាវិត បាញ់ប្រហារ បណ្តាលឲ្យរងរបួសធ្ងន់ ហើយភ្លាមៗត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យឯប្រទេសវៀតណាម នោះពេលនេះបានស្លាប់បាត់បង់ជីវិតហើយ
ប្រភពបន្តថា ចំណែកជនដៃដល់ ជាខ្មាន់កាំភ្លើង ត្រូវបានសមត្ថកិច្ចជំនាញបញ្ជូនទៅកាន់តុលាការ នារសៀលថ្ងៃនេះហើយ។
ជនរងគ្រោះឈ្មោះ សឿន ដាណេ ភេទស្រី អាយុ ៣៨ឆ្នាំ រស់នៅភូមិក្រាំងអាត់ ឃុំកំពង់សីលា ស្រុកកំពង់សីលា ខេត្តព្រះសីហនុ មករកស៊ីនៅក្រុងបាវិត។ ចំណែកជនដៃដល់ ឈ្មោះ កែវ ចិត្រា មានតួនាទីជាអធិការរងក្រុងបាវិត ទទួលផែនគ្រឿងញៀន អតីតជានគរបាលនៅក្រុងបាវិត ទើបតែប្រកាសតែងតាំង ជាអធិការរងបានប្រហែល៥ថ្ងៃតែប៉ុណ្ណោះ ត្រូវជាកូនប្រុសរបស់លោក កែវ គង់ អធិការនគរបាលក្រុងបាវិត ។
មហាជនបានរិះគន់យ៉ាងខ្លាំងថា សង្ស័យជនដែដល់ជាមន្ត្រីនគរបាលរូបនេះហាងអំណាចឪពុកជាអធិការហើយមើលទៅទើបហ៊ានធ្វើដូច្នេះមិនខ្លាចច្បាប់ មហាជនរិះគន់បន្ថែមទៀតថា មិនសំណា ថ្នាក់លើតែងតាំងមន្ត្រីរូមនេះជាអធិការរងក្នុងកន្លែងការងារតែមួយជាមួយឪពុកអញ្ចឹងទេ ខណៈដែលឪពុកជាអធិការទៅហើយនោះ នេះបញ្ជាក់អោយឃើញថា ការងារពុករលួយ។
សូមបញ្ជាក់ថា ហេតុការណ៍ភ្ញាក់ផ្អើលគួរឱ្យរន្ធត់នេះបានកេីតឡេីងកាលពីវេលាម៉ោង៦និង១០នាទីល្ងាចថ្ងៃទី២០ខែធ្នូ ឆ្នាំ២០១៩ នៅត្រង់ចំណុចហាង ផឹកស៊ីយីហោ សំណាងអាណេ ដែលមានទីតាំងស្ថិតនៅក្នុងភូមិ តាពៅ សង្កាត់បាវិត ក្រុងបាវិត ខេត្តស្វាយរៀង ៕
