ឆេះម៉ាសុីនច្រូតកណ្តាលវាលស្រែបង្កការភ្ញាក់ផ្អើលទាំងព្រឹក
បន្ទាយមានជ័យ៖ ម៉ាស៊ីនច្រូតស្រូវខ្នាតធំមួយគ្រឿងកំពុងតែច្រូតសុខៗស្រាប់តែឆ្លងភ្លើងឆាបឆេះកណ្តាលវាលស្រែបង្កការភ្ញាក់ផ្អើល កើតឡើងកាលពីវេលាម៉ោង៧ព្រឹកថ្ងៃទី២៩ខែធ្នូឆ្នាំ២០១៩នៅចំនុចវាលខាងភូមិកងវ៉ាងសង្កាត់កំពង់ស្វាយក្រុងសិរីសោភ័ណ ខេត្តបន្ទាយមានជ័យ ។
សមត្ថកិច្ចបានអោយដឹងថា ម្ចាស់ ម៉ាស៊ីនច្រូតមានឈ្មោះ លី ស៊ាវឡុង ភេទប្រុសអាយុ២៦ឆ្នាំរស់នៅភូមិពង្រសង្កាត់ កំពង់ស្វាយក្រុងសិរីសោភ័ណ ខេត្តបន្ទាយមានជ័យ ។
សមត្ថកិច្ចបានបន្តថា នៅពេលដែល ម៉ាស៊ីនច្រូតស្រូវឆាបឆេះនៅកណ្តាល វាលស្រែ គឺម៉ាស៊ីនច្រូតស្រូវបាន២ទៅ៣មុខហើយស្រាប់តែឆាបឆេះផ្នែកខាងក្រោយ ភ្លាមៗនោះត្រូវបានគេជួយយកទឹកពន្លត់តែមិនរលត់ ទើបរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តបានចេញទៅជួយអន្តរាគមន៍បាញ់ពន្លត់ទើបរលត់ទៅវិញមិនឆេះរាលដាលដល់ស្រូវក្នុងស្រែឡើយ។
សមត្ថកិច្ចបានបញ្ជាក់ថា៖ មូលហេតុដែលឆាបឆេះម៉ាស៊ីនច្រូតខ្នាតធំនេះបណ្តាលមកពីឆ្លងចរន្តភ្លើងទើបបណ្តាលអោយឆាបឆេះតែត្រូវបានពន្លត់ទាន់ពេលវេលា បណ្តាលឲ្យខូចខាតម៉ាស៊ីនច្រូតផ្នែកខាងក្រោយស្ទើទាំងស្រុង តែមិនបង្កឲ្យមានគ្រោះថ្នាក់ដល់មនុស្ស នោះទេ ៕
