រថយន្តក្រុងរបស់ក្រុមហ៊ុន អាសុីបូព៌ា ដឹកអ្នកដំណើរបើកបុកគោយន្តកន្ត្រៃស្លាប់ម្នាក់និងជាច្រើននាក់ទៀតរបួសធ្ងន់ស្រាល
បាត់ដំបង៖ យ៉ាងហោចណាស់ មានមនុស្សម្នាក់បានស្លាប់និងជាច្រើននាក់ទៀតរបួសធ្ងន់និងស្រាលក្នុងហេតុការគ្រោះថ្នាក់ចរាចរណ៍រថយន្តក្រុងដឹកអ្នកដំណើរ របស់ក្រុមហ៊ុន អាសុីបូព៌ា បើកលឿនខ្វះការប្រុងប្រយត្ន័សង្ស័យតៃកុងងោកបានជ្រុលទៅបុកគោយន្តកន្ត្រៃដឹកអុស ពីក្រោយពេញទំហឹងធ្លាក់ពីលើផ្លូវចូលប្រឡាយ ក្រឡាប់ផ្ងាជើង
ហេតុការណ៍គ្រោះថ្នាក់ចរាចរណ៍ គួរឲ្យរន្ធត់នេះបានកើតឡើងកាលពីវេលាម៉ោង០៦និង០០នាទីព្រឹកថ្ងៃទី៣០ខែធ្នូឆ្នាំ២០១៩ នៅលើកំណាត់ផ្លូវជាតិលេខ៥ ត្រង់ចំណុចក្បែរស្ពានអូរសណ្តាស់ ស្ថិតក្នុងភូមិស្រះកែវ ឃុំកំពង់ព្រះ ស្រុកសង្កែ ខេត្តបាត់ដំបង។
យោងតាមប្រភពព័ត៌មានពីកន្លែងកើតហេតុបានអោយដឹងថា មុនកើតហេតុគេឃើញរថយន្ត ក្រុងដឹកអ្នកដំណើររបស់ ក្រុមហ៊ុនអាស៊ីបូព៌ា ពណ៌ស លាយក្រហម ពាក់ស្លាកលេខភ្នំពេញ3E-0318បើកបរដោយបុរសម្នាក់និងមានដឹកអ្នកដំណើរជាច្រើននាក់ធ្វើដំណើរតាមបណ្ដោយផ្លូវជាតិលេខ៥ ទិសដៅពីភ្នំពេញទៅបាត់ដំបង ក្នុងល្បឿនយ៉ាងលឿនមិនប្រយត្ន័ ខណៈមកដល់ចំណុចកើតហេតុ សង្ស័យតៃកុងងោក ក៏បានជ្រុលទៅបុកពីក្រោយគោយន្តកន្ត្រៃដែលបើកស្របទិសគ្នានៅខាងមុខពេញទំហឹង ប៊ើងធ្លាក់ប្រឡាយ ឯរថយន្តបង្កជ្រុលធ្លាក់ស្រែបណ្ដាលអោយអ្នកដំណើរនៅក្នុងរថយន្តម្នាក់បានស្លាប់និងជាច្រើនអ្នកទៀតរងរបួសធ្ងន់និងស្រាល រីឯតៃកុងរថយន្តគៀបជាប់ក្នុងកាប៊ីនបាក់ជើង ។
ក្រោយពេលកើតហេតុ សមត្ថកិច្ចជំនាញចុះទៅដល់បញ្ជូនជនរងគ្រោះទៅសង្គ្រោះបន្ទាន់ភ្លាមៗនៅមន្ទីរពេទ្យ និងគាស់យកសពជនរងគ្រោះចេញពីរថយន្តដើម្បីធ្វើកំណត់ហេតុស្រាវជ្រាវ រកសាច់ញាតិឲ្យមកទទួលយកទៅធ្វើបុណ្យតាមប្រពៃណី ។ បន្ទាប់មកសមត្ថកិច្ចបាន វាសវែងយករថយន្តបង្កនិងគោយន្តទៅរក្សាទុកនៅការិយាល័យចរាចរណ៍ផ្លូវគោកខេត្ត ដើម្បីកសាងសំណុំរឿងចាត់ការបន្តតាមផ្លូវច្បាប់៕
