ព្រះពុទ្ធរូបជាច្រើងអង្គ ក្នុងវត្តឧណ្ណាលោម ត្រូវភ្លើងឆេះបង្កការភ្ញាក់ផ្អើលទាំងល្ងាច
ភ្នំពេញ៖ អគ្គីភ័យឆាបឆេះព្រះពុទ្ធរូបសាងអំពីឈើខូចខាតជាច្រើនអង្គ បង្កការភ្ញាក់ផ្អើលយ៉ាងខ្លាំង សំណាងមិនមានមនុស្សរងរបួស
ហេតុការណ៍នេះបានកើតឡើងកាលពីវេលាម៉ោង០៦និង១០នាទីល្ងាចថ្ងៃទី០៩ខែមករាឆ្នាំ២០២០ នៅក្នុងវត្តឧណ្ណាលោម ភូមិ២ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
សមត្ថកិច្ចបានឲ្យដឹងថា អ្នកមើលការខុសត្រូវព្រះសង្ឃ ព្រះនាម តឺល វ័ន្ត ព្រះជន្ម២៤ឆ្នាំគង់នៅវត្តឧណ្ណាលោម បានរាយការណ៍ឲ្យសមត្ថកិច្ចមូលដ្ឋានបានដឹងនិងចុះមកជួយអន្តរាគមន៍នឹងហៅរថយន្តពន្លត់អគ្គីភ័យមកជួយបាញ់ពន្លត់បានទាន់ពេលវេលាមិនឲ្យរាលដាលដល់កន្លែងផ្សេង។
សមត្ថកិច្ចបានបញ្ជាក់ថា មូលហេតុបណ្តាលអោយឆាបឆេះនេះ បណ្ដាលមកពីឆ្លងចរន្តអគ្គិសនី។ ចំពោះករណីអគ្គិភ័យនេះកម្លាំងសមត្ថកិច្ចជំនាញបានប្រើប្រាស់ទឹកអស់៣រថយន្តស្មេីនឹង១២ម៉ែត្រគូបជារថយន្តរបស់ការិយាល័យបង្ការនិងពន្លត់អគ្គីភ័យរាជធានីភ្នំពេញ ទើបរលត់ជាស្ថាពរនៅវេលាម៉ោង០៦និង៤៥នាទីល្ងាចថ្ងៃដដែល៕
