អាសូរណាស់! មនុស្សប្រុសស្រី២នាក់ត្រូវរថយន្តពាក់ស្លាកលេខ2BB-0035បុកនិងកិនស្លាប់រួចបើកគេចបាត់
ភ្នំពេញ៖ បុរសម្នាក់និងក្មេងស្រីម្នាក់ទៀតបានស្លាប់បាត់បង់ជីវិតយ៉ាងអាណោចអាធម៌ ខណៈកំពុងជិះម៉ូតូឌុបគ្នាត្រូវរថយន្តហាយប្រិតមួយគ្រឿងបើកបុកនឹងកិនអូសជាច្រើនម៉ែត្រ
ហេតុការណ៍គ្រោះថ្នាក់ចរាចរណ៍គួរឲ្យរន្ធត់បានកើតឡើងកាលពីវេលាម៉ោង១០ព្រឹកថ្ងៃទី១០ខែមករាឆ្នាំ២០២០ នៅចំណុចមុខការដ្ឋានចិន តាមបណ្តោយផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យរាជធានីភ្នំពេញ ។
យោងតាមប្រភពព័ត៌មានពីប្រជាពលរដ្ឋដែលបានឃើញហេតុការណ៍បានអោយដឹងថា មុនកើតហេតុបុរសរងគ្រោះជិះម៉ូតូមួយគ្រឿង ម៉ាក PCX ពណ៌ស ពាក់ស្លាកលេខ ភ្នំពេញ1IC-4551 ឌុបក្មេងស្រីម្នាក់ធ្វើដំណើរតាមបណ្តោយផ្លូវ៦០ម៉ែត្រ ក្នុងល្បឿនលឿនទិសដៅពីជើងទៅត្បូងដោយព្យាយាមវ៉ាគេឯងក៏ចូលទៅចំណែកផ្លូវម្ខាង ស្របពេលនោះក៏មានរថយន្តហាយប្រិត ពណ៌ស ពាក់ស្លាកលេខភ្នំពេញ 2BB-0035 កំពុងបើកបរបញ្ច្រាសទិសគ្នាជាមួយម៉ូតូ ក៏ជ្រុលបុកម៉ូតូពេញទំហឹងបណ្តាលអោយម៉ូតូខ្ទាតទៅម្ខាងចំណែកអ្នកជិះម៉ូតូចំនួន២នាក់ត្រូវកិននឹងអូសជាច្រើនម៉ែត្របណ្តាលអោយស្លាប់ភ្លាមៗ ។ ប្រភពដដែរបន្តថា បន្ទាប់ពីបុកហើយរថយន្តបង្កបានបើកគេចពីកន្លែងកើតហេតុបាត់ស្រមោល។
ក្រោយកើតហេតុសមត្ថកិច្ចមូលដ្ឋាននឹងជំនាញ ចរាចរខណ្ឌមានជ័យបានចុះមកដល់ទីតាំង ហើយធ្វើការវាស់វែងយកម៉ូតូប្រគល់អោយទៅកម្លាំងនគរបាលជំនាញចរាចរនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំស្រាវជ្រាវតាមចាប់អ្នកបើកបររថយន្តបង្កយកមកដោះស្រាយគ្នានៅពេលក្រោយ ចំណែកសពត្រូវបានដឹកយកទៅតម្កលនៅវត្តទឹកថ្លា រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
