អាណិតណាស់! ជាងផ្សារដែកម្នាក់ត្រូវចរន្តអគ្គីសនីឆក់ស្លាប់យ៉ាងអាណោចអធម៌
ខេត្តកណ្តាល៖ បុរសវ័យចំណាស់ជាជាងដែកម្នាក់ត្រូវចរន្តអគ្គិសនី ឆក់ធ្លាក់ពីលើដំបូលផ្ទះផ្ដាច់ជីវិត យ៉ាងអាណោចអធម៌ ខណៈកំពុងធ្វើការហើយលើកដែកមិនប្រយត្ន័ជ្រុលទៅប៉ះនិងខ្សែកាបភ្លើង
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង០៨និង៣០នាទីព្រឹកថ្ងៃទី១០ខែមករាឆ្នាំ២០២០ នៅចំណុចផ្ទះជួលជុលមួយកន្លែង តាមបណ្ដោយផ្លូវ២១បេ ភូមិព្រែកឡុង សង្កាត់រកាខ្ពស់ ក្រុងតាខ្មៅ ខេត្តកណ្តាល ។
សពបុរសជនរងគ្រោះមានឈ្មោះ ជឿន ពេញ ភេទ ប្រុស អាយុ៥៨ឆ្នាំ ជនជាតិខ្មែរ មុខរបរ ជាងដែក មានស្រុកកំណើត ភូមិក្តីឈ្វិត ឃុំស្រែស្ដុក ស្រុកកណ្តៀង ខេត្តពោធិ៍សាត់ ។
បើតាមសម្ដីឈ្មោះ ផន ម៉ាប់ ភេទ ប្រុស អាយុ៤៩ឆ្នាំ មុខរបរ ជាងផ្សារដែក ដែលជាអ្នកធ្វើការជាមួយជនរងគ្រោះបានអោយដឹងថា៖ នៅវេលាម៉ោង ៧ ព្រឹកថ្ងៃកើតហេតុរូបគាត់បានមកធ្វើសំយាបផ្ទះឱ្យឈ្មោះ ឡេង ហ៊ី ជាមួយជនរងគ្រោះ លុះវេលាម៉ោង០៨និង៣០នាទីព្រឹក ជនរងគ្រោះដែលកំពុងផ្សាដែកនៅលើដំបូលដូចគ្នា បានលើកដែកហុចអោយឈ្មោះ ផន ម៉ាប់ មិនបានប្រុងប្រយត្ន័ក៏ប៉ះនឹងខ្សែកាបភ្លើង បណ្តាលឱ្យឆក់ធ្លាក់ពីលើដំបូលមកក្រោម បែកក្បាលផុងលលាហូរឈាម ដាច់ខ្យល់ស្លាប់ នៅនិងកន្លែងតែម្តង ភ្លាមៗត្រូវបានអ្នកជិតខាងស្រែកឱ្យគេជួយតែអកុសលជនរងគ្រោះបានដាច់ខ្យល់ស្លាប់បាត់ទៅហើយ និងបានរាយការណ៍ជូនសមត្ថកិច្ចមូលដ្ឋានចុះមកពិនិត្យ ។
ប្រភពបន្តថា បន្ទាប់ពីសមត្ថកិច្ចជំនាញចុះមកធ្វើកោសលវិច្ឆ័យរួចរាល់បានបញ្ជាក់ថា សពជនរងគ្រោះមានស្នាមផុងលលាដ៍ក្បាល រងរបួសធ្ងន់ធ្ងរបណ្ដាលឲ្យស្លាប់តែម្ដង ។
ក្រោយពេលកើតហេតុសមត្ថកិច្ចមូលដ្ឋាននិងសមត្ថកិច្ចជំនាញ បានធ្វើកំណត់ហេតុប្រគល់ សពជនរងគ្រោះអោយក្រុមគ្រួសារ យកទៅធ្វើបុណ្យ តាមប្រពៃណីនៅស្រុកកំណើត៕
