ម្ដាយពេជ្រ សូលីកា តារាចំរៀងក្លាយជាឃាតក ត្រូវនគរបាលឃាត់ខ្លួនយកមកធ្វើត្រាបពីសកម្មភាពសម្លាប់ជនរងគ្រោះ
ភ្នំពេញ៖ កម្លាំងនគរបាលខណ្ឌមានជ័យនៅព្រឹកថ្ងៃទី១៣ខែមករាឆ្នាំ២០២០នេះបាននាំខ្លួនស្ត្រីជាជនសង្ស័យឃាតក ដែលសម្លាប់ស្ត្រី ម្នាក់តែងខ្លួនធ្វើប្រុស នៅក្នុងផ្ទះលេខផ្ទះលេខL45A ផ្លូវលេខV16Aក្រុម១០ ភូមិទួលរកាសង្កាត់ចាក់អង្រែក្រោម ខណ្ឌមានជ័យ យកអោយមកធ្វើត្រាបតាមពីសកម្មភាពសម្លាប់ជនរងគ្រោះ ។
សូមរំលឹកថា កាលពីវេលាម៉ោង៣រសៀលថ្ងៃទី១២ខែមករាឆ្នាំ២០២០ មានការភ្ញាក់ផ្អើលករណីឃាតកម្មសម្លាប់ស្ត្រីម្នាក់នៅក្នុងបុរី VILLA TOWN សង្កាត់ចាក់អង្រែក្រោម ខណ្ឌមានជ័យ ភ្លាមៗកម្លាំងសមត្ថកិច្ចចុះទៅដល់កន្លែងកើតហេតុដើម្បីពិនិត្យនិងបានឃាត់ខ្លួនសង្ស័យយកមកសួរនាំនៅប៉ុស្តិ៍នគរបាលចាក់អង្រែក្រោមតែម្ដង ។
ស្ត្រីជាជនសង្ស័យមានឈ្មោះ សុិន ស្រីនាង អាយុ៤៥ឆ្នាំ ស្នាក់នៅផ្ទះកើតហេតុ ត្រូវជាម្ដាយ របស់អ្នកនាង ពេជ្រ សូលីកា តារាចំរៀង ល្បីឈ្មោះ
ចំណែកជនរងគ្រោះមានឈ្មោះ ងិន សុខលី ភេទស្រី អាយុ៥០ឆ្នាំ មុខរបរលក់កាហ្វេ និងចងការប្រាក់ ស្នាក់នៅសង្កាត់ផ្សារដេប៉ូ១ ខណ្ឌទួលគោក ។
បើយោងតាមរបាយការណ៍របស់នគរបាលនិងចម្លើយសារភាពរបស់ជនសង្ស័យបានឲ្យដឹងថា មុនពេលកើតហេតុជនរងគ្រោះបានជិះម៉ូតូម៉ាកហុងដា មកលេងផ្ទះជនសង្ស័យ ហើយជនសង្ស័យបានសួរទៅជនរងគ្រោះរឿងបាត់ចិញ្ចៀនពីរវង្សគិតជាទឹកប្រាក់ប្រហែលជាងពីរមុឺនដុល្លារនិងប្រចណ្ឌ ជនរងគ្រោះសង្ស័យ ជាប់ពាក់ពន្ធ័ជាមួយស្រីផ្សេង ភ្លាមៗពេលនោះក៏កើតជាជម្លោះប្រតាយប្រតបគ្នាធ្វើអោយជនរងគ្រោះដួលចូលក្នុងបន្ទប់ទឹក ហើយជនសង្ស័យបានយកខ្សែចងដៃជនរងគ្រោះមកក្រោយនិងចងជើងរួចយកក្នើយទៅសង្កត់ពីលើបណ្ដាលឲ្យថប់ដង្ហើមស្លាប់តែម្ដង ។
ជនសង្ស័យបន្ទាប់ពីដឹងថា ជនរងគ្រោះស្លាប់ក៏បានស្រាយចំណងចេញរួចយកមកដាក់ឲ្យដេកលើពួក លុះដល់វេលាម៉ោង០១រសៀលថ្ងៃទី១២ខែមករាឆ្នាំ២០២០ ជនស្ស័យបានតេទៅប្រាប់សាច់ញាតិ ជនរងគ្រោះថា ឈ្មោះងិន សុខលី បានស្លាប់នៅផ្ទះរបស់ខ្លួនបន្ទាប់ពីហូបបាយហើយដេក ទើបបង្កអោយមានការភ្ញាក់ផ្អើល ហើយបង ប្អូនជនរងគ្រោះក៏បានរាយការណ៍ទៅសមត្ថកិច្ចចុះទៅពិនិត្យនិងឃាត់ខ្លួនជនសង្ស័យតែម្ដង ។
បច្ចុប្បន្ន ជនស្ស័យត្រូវបានសមត្ថកិច្ចឃាត់ខ្លួនបណ្ដោះអាសន្ននៅអធិការនគរបាលខណ្ឌមានជ័យ ដើម្បីកសាងសំណុំរឿងបញ្ជួនទៅតុលាការចាត់ការបន្តតាមផ្លូវច្បាប់៕
