អាសូរណាស់! ជិះម៉ូតូទាក់ដៃចង្កូតគ្នាដួលត្រូវរថយន្តធំមកពីក្រោយកិនស្លាប់
ភ្នំពេញ៖ បុរសម្នាក់បានស្លាប់បាត់បង់ជីវិតយ៉ាងអាណោចអាធម៌នៅកណ្តាលផ្លូវ ខណៈជិះម៉ូតូដៃចង្កូតជាមួយម៉ូតូមួយគ្រឿងទៀតដួលហើយត្រូវរថយន្តមកពីក្រោយជាន់ហ្វ្រាំងមិនទាន់ជ្រុលកិនបែកក្បាលកាលពីវេលាម៉ោង ១២នឹង០០រសៀលថ្ងៃទី ១៦ ខែ មករាឆ្នាំ ២០២០ ស្ថិតនៅតាមបណ្តោយផ្លូវជាតិលេខ៣ សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
បុរសរងគ្រោះដែលត្រូវរថយន្តកិនស្លាប់មានឈ្មោះ ចាន់ វិចិត្ត ភេទប្រុស អាយុ៣៩ឆ្នាំមុខរបរលក់ជ្រក់ស្ពៃ ស្នាក់នៅភូមិព្រែកស្ទង ឃុំព្រែកគយ ស្រុកស្អាង ខេត្តកណ្តាល ។ ចំណែកអ្នកបើកបររថយន្តបង្កមិនត្រូវបានស្គាល់អត្តសញ្ញាណនោះទេ បន្ទាប់ពីកើតហេតុបានចុះពីរថយន្តរត់គេចខ្លួនបាត់ស្រមោល។
បើតាមសម្តីប្រជាពលរដ្ឋដែលឃើញហេតុការណ៍បានអោយដឹងថា ដំបូងបុរសរងគ្រោះបានជិះម៉ូតូសង់កូរេ ពណ៌ក្រហម ធ្វើដំណើរចេញពីផ្លូវបេតុងឆ្ពោះមកផ្លូវជាតិលេខ៣ ខណៈមកដល់ផ្លូវជាតិក៏បានទាក់ដៃចង្កូតជាមួយម៉ូតូមួយគ្រឿងផ្សេងទៀតបណ្តាលអោយដួលខ្ទាតទៅលើកផ្លូវស្របពេលមានរថយន្តមួយគ្រឿងម៉ាកហុីយ៉ាន់ ពាក់ស្លាកលេខ កំពង់ធំ3A -1033 កំពុងធ្វើដំណើរតាមបណ្តោយផ្លូវជាតិលេខ៣ ទិសដៅពីជើងទៅត្បូងក្នុងល្បឿនលឿនជាន់ហ្វ្រាំងមិនទាន់ក៏ជ្រុលកិនចំក្បាលបុរសរងគ្រោះ បណ្តាលអោយធ្លាយខួរស្លាប់យ៉ាងអាណោច អាធម៌ ។ ប្រភពដដែរបន្តថាបន្ទាប់ពីកើតហេតុរថយន្តបង្កបានព្យាយាមបើកគេចបានប្រហែល៣០០ម៉ែត្រ ទើបតៃកុងរថយន្តចុះពីលើរថយន្តរត់គេចខ្លួនបាត់ ទុករថយន្តចោល។
ក្រោយពេលកើតហេតុសមត្ថកិច្ចមូលដ្ឋានបានសហការជាមួយនគរបាលជំនាញចុះវាស់វែងអូសយករថយន្តបង្កនឹងម៉ូតូយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនាពេលក្រោយ ចំណែកសពត្រូវបានប្រគល់អោយសាច់ញាតិដឹកយកទៅធ្វើបុណ្យតាមប្រពៃណីនៅឯស្រុកកំណើត៕
