ខឹងប្ដីមានស្រីយកកន្សែងរឹតកប្ដីស្លាប់នៅមុខបន្ទប់ជួលត្រូវឃាតខ្លួន
ភ្នំពេញ៖ ស្រ្តីអ្នកលក់បញ្ចុកវ័យ៥៧ឆ្នាំម្នាក់យកកន្សែងរឹតកប្ដីបណ្ដាលឲ្យស្លាប់នៅនិងមុខបន្ទប់ជួល ព្រោះតែខឹងប្ដីមានស្រី ហើយមករករឿងវាយធ្វើបាបរូបគាត់និងសុំលែងគ្នា
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១២និង៣០នាទីរសៀល ថ្ងៃទី២១ ខែមករាឆ្នាំ២០២០ ស្ថិតក្នុងភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
សមត្ថកិច្ចបានឲ្យដឹងថាស្ត្រីដែលរឹតកសម្លាប់ប្ដីដែល(ឃាត់ខ្លួន)មានឈ្មោះ សុខ វណ្ណរ៉ា អាយុ៥៧ឆ្នាំ មុខរបរលក់នំបញ្ចុក ស្នាក់នៅផ្ទះកើតហេតុ ។ ចំណែកសពជនរងគ្រោះជាប្ដី ដែល(ស្លាប់)មានឈ្មោះ ស្បោង គឹម អាយុ៥៩ឆ្នាំ មុខរបរជាងលាបថ្នាំផ្ទះ ស្នាក់នៅជាមួយគ្នា ។
សមត្ថកិច្ចបន្តថា ស្ត្រីជនសង្ស័យជាប្រពន្ធជនរងគ្រោះបានឆ្លើយសារភាពនៅមុខសមត្ថកិច្ចថា គាត់ទ្រាំនិងប្តីរបស់ខ្លួនមានស្រីច្រើនមិនបានហើយគាត់គ្មានចេតនាសម្លាប់ប្តីនោះទេ គ្រាន់តែរឹតកដើម្បីកុំអោយវាយធ្វើបាបខ្លួនតែប៉ុណ្ណោះប៉ុន្តែជ្រុលដៃក៏ស្លាប់តែម្ដងហើយគាត់ក៏មិនបានរត់ទៅណានោះដែរ ។
យោងតាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ កាលពីយប់ថ្ងៃទី២០ ខែមករាឆ្នាំ២០២០ បុរសជាប្តីបានចេញពីផ្ទះទៅដេកផ្ទះសំណាក់យីហោ”មិត្តយើង” ជាមួយស្រីថ្មី ដែលនៅក្បែរផ្ទះ លុះព្រឹកឡើងថ្ងៃទី២១ខែឆ្នាំដដែល ជនរងគ្រោះក៏ត្រឡប់មកផ្ទះវិញក៏ឈ្លោះគ្នាជាមួយប្រពន្ធមួយប្រាវ រួចប្រពន្ធក៏បានចេញទៅលក់នំបញ្ចុកបាត់ ។ លុះដល់វេលាម៉ោងប្រហែល១១ព្រឹកថ្ងៃដដែលក៏បានឈ្លោះគ្នាម្តងទៀត ដោយបុរសជាប្ដីជេប្រមាថស្ត្រីជាប្រពន្ធ និងគំរាមអារ.កសម្លាប់ ហើយបានសុំប្រពន្ធលែង រួចក៏ប្រតាយប្រតបគ្នាទៅវិញទៅមក ហើយប្រពន្ធបានយកកន្លែងពោះគោមករឹតកប្ដីបណ្តាលអោយស្លាប់តែម្តង ។
បច្ចុប្បន្នស្រ្តីជាជនដៃដល់ត្រូវបានសមត្ថកិច្ចឃាត់ខ្លួនបណ្ដោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីកសាងសុំណុំរឿងចាត់ការតាមនីតិវិធី ច្បាប់ ។ ចំណែកសពជនរងគ្រោះក្រោយធ្វើកោសល្យវិច្ច័យរួច សមត្ថកិច្ចបានសន្និដ្ឋានថា សពពិតជាស្លាប់ដោយសារឹត.កមែន រួចធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
