នគរបាលខណ្ឌពោធិសែនជ័យ ឃាត់ខ្លួនជនសង្ស័យ៤នាក់ដកហូតថ្នាំញៀន៦១កញ្ចប់
ភ្នំពេញ៖ កម្លាំងនគរបាលខណ្ឌពោធិសែនជ័យ ស្រាវជ្រាវ បង្ក្រាបករណីចែកចាយគ្រឿងញៀនចាប់ខ្លួនជនសង្ស័យប្រុសស្រីចំនួន៤នាក់ ជាមុខសញ្ញាចែកចាយនិងជួញដូរថ្នាំញៀន យ៉ាងសកម្ម
ហេតុការណ៍ប្រតិបត្តិការបង្ក្រាបនេះបានធ្វើកាលពីវេលាម៉ោង៣រសៀល ថ្ងៃទី២១ ខែមករា ឆ្នាំ២០២០ នៅចំណុចបន្ទប់ជួលលេខ៣ ផ្លូវលំ ភូមិត្រពាំងទា សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ ។
លោកវរសេនីយ៍ទោ ម៉ន វុធី អធិការខណ្ឌពោធិសែនជ័យ បានអោយថា ជនសង្ស័យដែលកម្លាំងនគរបាលឃាត់ខ្លួនរួមមាន៖ ទី១-ឈ្មោះ ចាន់ រិទ្ធី ភេទប្រុស អាយុ៣១ឆ្នាំ មុខរបរ លាងម៉ូតូ ស្នាក់នៅ ផ្ទះជួល ភូមិព្រៃព្រីងជើង សង្កាត់ចោមចៅ៣ ខណ្ឌពោធិសែនជ័យ មានស្រុកកំណើត ភូមិត្នោត ឃុំត្នោត ស្រុកកំពង់រោទ៍ ខេត្តស្វាយរៀង ។ ទី២-ឈ្មោះ ភឿន ទូច ភេទប្រុស អាយុ៣២ឆ្នាំ មុខរបរ កម្មករសំណង់ ជាម្ចាស់បន្ទប់ ស្នាក់នៅកន្លែងខាងលើ មានស្រុកកំណើត ស្រុក រលៀប្អៀរ ខេត្តកំពង់ឆ្នាំង ។ ទី៣-ឈ្មោះ រឿន ថាវី ភេទស្រី អាយុ២៩ឆ្នាំមុខរបរ កម្មកររោងចក្រ ជាប្រពន្ធម្ចាស់បន្ទប់ ស្នាក់នៅបន្ទប់ខាងលើ មានស្រុកកំណើត ស្រុកសំរោងទង ខេត្តកំពង់ស្ពឺ ។ ទី៤-ឈ្មោះ កង សុភ័ក្រ ភេទប្រុស អាយុ៤០ឆ្នាំមុខរបរមិនពិតប្រាកដស្នាក់នៅផ្ទះជួល ក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិសែនជ័យ មានស្រុកកំណើត ភូមិស្វាយយ៉ា ឃុំស្វាយជ្រុំ ស្រុក ស្វាយជ្រុំ ខេត្ត ស្វាយរៀង ។
លោកអធិការបានបន្តថា សម្ភារៈដកហូតបរួមមាន៖ ថ្នាំញៀន៥៨កញ្ចប់តូចនិង៣កញ្ចប់ធំល្មមកញ្ចប់-ម៉ូតូ៣គ្រឿង សម្ភារៈពាក់ព័ន្ធមួយចំនួនទៀត។
បច្ចុប្បន្ន ជនសង្ស័យទាំង៤នាក់រួមទាំងវត្ថុតាងត្រូវបានសមត្ថកិច្ចឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌពោធិសែនជ័យ ដើម្បីកសាងសំណុំរឿងបញ្ជួនទៅតុលាការចាត់ការបន្តតាមនិតិវិធីច្បាប់៕
