មន្ត្រីយោធាម្នាក់សង្ស័យស្រវឹងស្រាបើករថយន្ត ស្លាកលេខ-ខេមរភូមិន្ទបុករះម៉ូតូនិងកង់របួសមនុស្ស៤នាក់
កំពង់ឆ្នាំង៖ បុរសម្នាក់ដែលគេស្គាល់ថា ជាមន្ត្រីយោធា នៅអង្គភាពវិស្វកម្មក្រសួងការពារជាតិ មានឋានន្តរសក្តិ អនុសេនីយ៍ឯក បើករថយន្តក្នុងល្បឿនលឿនសង្ស័យស្រវឹង និងខ្វះការប្រុងប្រយត្ន័បានជ្រុលទៅបុករះម៉ូតូ៣គ្រឿងនិងកង់១គ្រឿងបណ្ដាលឲ្យរងរបួសមនុស្សប្រុសស្រីចំនួន៤នាក់
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៤និង០៥នាទីរសៀលថ្ងៃទី២១ខែមករាឆ្នាំ២០២០ នៅតាមណ្ដោយផ្លូវជាតិលេខ៥ ចន្លោះគីឡូម៉ែត្រលេខ (87-88) ចំណុចមុខវិទ្យាល័យព្រះបាទសុរាម្រឹត ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
សមត្ថកិច្ចបានអោយដឹងថា មូលហេតុដែលបង្កឱ្យកេីតមានគ្រោះថ្នាក់នេះ បណ្តាលមកពីរថយន្តម៉ាកនីសាន់ (ណាវ៉ារ៉ា) ពណ៌ស្លែ ពាក់ស្លាកលេខខេមរភូមិន្ទ 2-7436 បើកបរ ដោយបុរសម្នាក់ឈ្មោះ លី ហួត ភេទប្រុស ជាមន្ត្រីយោធា នៅអង្គភាពវិស្វកម្មក្រសួងការពារជាតិ ឋានន្តរសក្តិ អនុសេនីយ៍ឯក ។ ដោយធ្វើដំណើរតាមបណ្ដោយផ្លូវជាតិលេខ៥ទិសដៅពីត្បូងទៅជើងក្នុងល្បឿនលឿន មិនប្រយត្ន័ ហេីយក៏ជាន់ហ្វ្រាំងរេចង្កូតជ្រុលទៅបុករះម៉ូតូ៣គ្រឿងនិងកង់១គ្រឿងដែលបម្រុង នឹងឆ្លងកាត់ផ្លូវបណ្ដាលឲ្យរងរបួសមនុស្សចំនួន ៤នាក់ (ស្រីម្នាក់របួសធ្ងន់) ។ សមត្ថកិច្ចបន្តថា សម្ភារៈខូចខាតរួមមាន៖ ម៉ូតូ ៣គ្រឿង-កង់ ១គ្រឿង- រថយន្ត ១គ្រឿង
– បង្គោលភ្លើង ១ដើមកំពិត និងធ្លាក់អំពូលបែក០១ ។
ក្រោយពេលកើតហេតុ កម្លាំងសមត្ថកិច្ចបានឃាត់ខ្លួនអ្នកបើកបរបញ្ជួនទៅឲ្យសមត្ថកិច្ចជំនាញនិងវាស់វែងយករថយន្តនិងម៉ូតូកង់ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋានខេត្កកំពង់ឆ្នាំងដើម្បីចាត់ការតាមនីតិវិធីច្បាប់ ៕
