ញាក់សាច់! បាក់ដងស្ទូចក្នុងការដ្ឋានApartment កំពុងសាងសង សង្កត់ចំរថយន្ត មន្ត្រីស្ថានទូតអាមេរិក បណ្តាលស្ត្រីជាមន្ត្រីទូតម្នាក់របួសធ្ងន់
ភ្នំពេញ៖ ស្ត្រីម្នាក់ជាមន្ត្រីបម្រើការងារនៅស្ថានទូតអាមេរិក ត្រូវបានរងរបួសធ្ងន់បញ្ជូនទៅសង្គ្រោះនៅមន្ទីរពេទ្យភ្លាមៗខណៈកំពុងជិះក្នុងរថយន្តធ្វើដំណើរតាមផ្លូវ ត្រូវដងស្ទូចក្នុងការដ្ឋាន Apartment ដ៏ធំមួយកន្លែងកំពុងសាងសង បានបាក់សង្កត់ចំពីលើរថយន្ត ៖ ហេតុការណ៍នេះបានបង្កឲ្យការភ្ញាក់ផ្អើលកាលពីវេលាម៉ោង៨ព្រឹក ថ្ងៃទី ៤ ខែកុម្ភៈ ឆ្នាំ២០២០ នៅតាមបណ្ដោយផ្លូវក្បែស្ថានទូតរុស្សុីស្ថិតនៅភូមិ១៤សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
យោងតាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញស្ត្រីរងគ្រោះ ដែលជាមន្ត្រីស្ថានទូតអាមេរិកប្រចាំនៅកម្ពុជា បានជិះរថយន្តមួយគ្រឿងម៉ាក ហុងដា ពណ៌ស ពាក់ស្លាកលេខ CD-25 -130 ដែលមានតៃកុងម្នាក់ជាអ្នកបើក ដោយធ្វើដំណើរទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែដងស្ទូចដែលដែលនៅការដ្ឋានកំពុងសាងសង់ រលំសង្កត់ចំលើរថយន្ត បណ្តាលឲ្យស្ត្រីដែលកំពុងជិះក្នុងរថយន្តរងរបួស យ៉ាងដំណំភ្លាមៗត្រូវបានគេបញ្ជូនទៅកាន់មន្ទីរពេទ្យដើម្បីព្យាបាលផងដែរ។
ប្រភពដដែលបានបន្តថា បន្ទាប់ពីកើតហេតុកម្លាំងសមត្ថកិច្ចបានឃាត់ខ្លួនមនុស្សចំនួន៤យកទៅសួរនាំ ។
ក្រោយមកកម្លាំងអាជ្ញាធរមានសមត្ថកិច្ចខណ្ឌចំការមន សហការជាមួយកម្លាំងជំនាញបានចុះមកកន្លែងកើតហេតុដើម្បីធ្វើការស្រាវជ្រាវ បច្ចេកទេស នៅក្នុងការដ្ឋានខាងលើ ដើម្បីចាត់ការតាមនិតិវិធី។
ជុំវិញបញ្ហាខាងលើនេះពលរដ្ឋមានការព្រួយបារម្មរណ៍យ៉ាងខ្លាំងចំពោះសុវត្តិភាពដែលសព្វថ្ងៃនេះគេសង្កេតឃើញការដ្ឋានកំពុងសាងសងជាច្រើនកន្លែងក្នុងរាជធានីភ្នំពេញដែលមានដងសន្ទួចដូចជាការដ្ឋានខាងលើ ។ពលរដ្ឋបានលើកឡើងថា នេះសំណាងហើយដែលបាក់ធ្លាក់មិនចំអ្នកដែលធ្វើដំណើដោយម៉ូតូ ម្លេះអាចនិងមានមនុស្សស្លាប់ជាក់ជាមិនខាន ៕
