និស្សិតឆ្នាំទី៤ម្នាក់ជួបគ្រោះចរាចរណ៍ស្លាប់យ៉ាងអាណោចអធម៌ ខណៈជិះម៉ូតូមករៀន
ភ្នំពេញ៖ យុវជនម្នាក់ដែលជានិស្សិត សកលវិទ្យាល័យកសិកម្មចំការដូង ជិះម៉ូតូមករៀនជ្រុលបុករថយន្ដដឹកដីកំពុងបើកបត់ឆ្លងផ្លូវបណ្ដាលអោយបោកក្បាលនិងថ្នល់ខ្ទាតចូលក្រោមរថយន្តកិនបែកក្បាលស្លាប់ភ្លាមៗនៅកន្លែងយ៉ាងអាណោចអធម៌
គ្រោះថ្នាក់ចរាចរណ៍គួរឲ្យរន្ធត់នេះបានកើតឡើងកាលពីវេលាម៉ោង០១និង២០នាទី រសៀលថ្ងៃទី០៥ខែកុម្ភះ ឆ្នាំ២០២០ នៅចំនុចមុខវត្តគោកអំពឹលតាមបណ្ដោយផ្លូវ៥០ម៉ែត្រ ក្នុងសង្កាត់ជើងឯក ខណ្ឌដង្កោ រាជធានីភ្នំពេញ។
សពជនរងគ្រោះមានឈ្មោះ ប្លុង ផាក់ភេទប្រុស អាយុ២២ ឆ្នាំ ជានិស្សិត ឆ្នាំទី៤នៅសកលវិទ្យាល័យកសិកម្មចំការដូង ស្នាក់នៅក្រុងតាខ្មៅ និងមានស្រុកកំណើត ភូមិភ្នំដី ឃុំស្លែងស្លែង ស្រុកស្រីស្នំ ខេត្តសៀមរាប។
យោងតាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញ រថយន្ដធន់ធំដឹកដី ពាក់ស្លាកលេខ ភ្នំពេញ3C-5161 បើកបរដោយបុរសម្នាក់ធ្វើដំណើរតាមបណ្ដោយផ្លូវ៥០ម៉ែត្រទិសដៅពីលិចទៅកើត សង្ស័យចេញពីការដ្ឋានចាក់ដីនៅក្បែរនោះ ខណៈមកដល់ចំណុចកើតហេតុក៏បានបត់ឆ្វេងឆ្លងផ្លូវត្រឡប់ក្រោយ ។
ប្រភពដដែលបានបន្តថា លុះពេលរថយន្ដកំពុងបត់ ស្រាប់តែមានយុវជនរងគ្រោះជិះម៉ូតូមួយគ្រឿងម៉ាក ហុងដា ឌ្រីម សេរីឆ្នាំ២០១៦ ពណ៍ខ្មៅ ពាក់ស្លាកលេខ ភ្នំពេញ1FR-6210ធ្វើដំណើរតាមបណ្ដោយផ្លូវ៥០ម៉ែត្រដូចគ្នាទិសដៅពិកើតទៅលិច ខណៈមកកន្លែងកើតហេតុក៏ជ្រុកទៅបុកចំកណ្ដាលរថយន្ដបណ្ដាលអោយដួលត្រូវរថយន្តកិនបែកក្បាលស្លាប់ ចំណែកម៉ូតូគៀបជាប់កង់រថយន្ដអូសប្រហែល៥០ម៉ែត្រ បន្ទាប់ពីកើតហេតុ តៃកុង រថយន្តបានចុះរត់គេចខ្លួនបាត់។
ក្រោយពេលកើតហេតុកម្លាំងសមត្ថកិច្ចមូលដ្ឋានចុះដល់កជួយសម្រួលចរាចរណ៍និងបានទំនាក់ទំនងទៅកម្លាំងសមត្ថកិច្ចជំនាញចុះមកវាស់វែងយករថយន្ដនិងម៉ូតូទៅរក្សាទុកនៅការិយាល័យចរាចរណ៍ផ្លូវគោកដើម្បីកសាងសំណុំរឿងចាត់ការបន្ត ។ ចំណែកសពជនរងគ្រោះសមត្ថកិច្ច ធ្វើកំណត់ហេតុប្រគល់ជួនសាច់ញាតិដឹកយកទៅធ្វើបុណ្យតាមប្រពៃណីនៅឯស្រុកកំណើត៕
