ផ្ទះប្រជាពលរដ្ឋមួយខ្នងនៅជាន់ទី៤ត្រូវអគ្គីភ័យឆាបឆេះផ្អើលដល់សមត្ថកិច្ចទាំងយប់
ភ្នំពេញ៖ អគ្គីភ័យបានឆាបឆេះផ្ទះប្រជាពលរដ្ឋ មួយខ្នងនៅជាន់ទី៤បង្កការភ្ញាក់ផ្អើលដល់ សមត្ថកិច្ចចេញរថយន្តពន្លត់អគ្គីភ័យជាច្រើនគ្រឿងជួយអន្តរាគមន៍បាញ់ពន្លត់
ហេតុការណ៍គ្រោះអគ្គីភ័យខាងលើនេះបានកើតឡើងកាលពីវេលាម៉ោង០៩និង៣០នាទីយប់ថ្ងៃទី១០ខែកុម្ភៈឆ្នាំ២០២០ នៅតាមបណ្ដោយផ្លូវលេខ៨១ ក្រុម៤០ភូមិ១០ សង្កាត់បឹងរាំង ខណ្ឌដូនពេញ ។
យោងតាមប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានអោយដឹងថា មុនដំបូងគេឃើញផ្សែងហុយចេញពីផ្ទះកើតហេតុ រួចបង្កជាអណ្ដាតភ្លើងសន្ធោសន្ធៅភ្ញាក់ផ្អើលដល់អ្នកជិតខាងនិងបានរាយការណ៍ទៅសមត្ដកិច្ច និងអាជ្ញាធរមូលដ្ឋាន ចេញម៉ូតូទឹកនិងរថយន្តពន្លត់អគ្គីភ័យជាច្រើនគ្រឿងមកជួយអន្តរាគមន៍បាញ់ពន្លត់ឲ្យរលត់ទៅវិញទាន់ពេលវេលាមិនអោយរាលដាលដល់ផ្ទះប្រជាពលរដ្ឋផ្សេងទៀត ។
សមត្ថកិច្ចបានឲ្យដឹងថា ក្នុងប្រតិបត្តិការណ៍អន្តរាគមន៍ពន្លត់អគ្គីភ័យនេះកម្លាំងសមត្ថកិច្ចជំនាញបានប្រើប្រាស់ម៉ូតូទឹករបស់រដ្ឋបាលខណ្ឌដូនពេញចំនួន០៤គ្រឿង និង រថយន្តរបស់ការិយាល័យបង្កានិងពន្លត់អគ្គិភ័យចំនួន ០៨គ្រឿងទើបរលត់ទៅវិញទាំងស្រុងនៅម៉ោង១០និង១៥នាទីយប់ថ្ងៃដដែល ។
សមត្ថកិច្ចបានបន្តថា នៃគ្រោះអគ្គីភ័យខាងលើ សង្ស័យបណ្ដាលមកពីឆ្លងចរន្តអគ្គិសនី។
សមត្ថកិច្ចបន្ថែមថា ក្នុងករណីអគ្គីភ័យនេះបានបំផ្លាញទ្រព្យសម្បត្តិម្ចាស់ផ្ទះអស់មួយចំនួន តែមិនបណ្ដាលអោយមានមនុស្សរងរបួសនោះទេ ៕
