សមត្ថកិច្ចដេញចាប់ជនសង្ស័យឆក់កាបូបផ្ទុះអាវុធ១គ្រាប់

ភ្នំពេញ៖ ជនសង្ស័យឆក់កាបូប២នាក់ត្រូវបានកម្លាំង ល្បាតប៉ុស្តិ៍នគរបាលភ្នំពេញថ្មី ប្រទះឃើញនិងបានជិះម៉ូតូដេញតាមចាប់រហូតមានការផ្ទុះអាវុធបណ្តាលឲ្យជនសង្ស័យម្នាក់ត្រូវរបួសដៃ និងរត់ទៅចូលក្នុងទឹកបឹងកំភ្លោក បង្កការភ្ញាក់ផ្អើលដល់សមត្ថកិច្ចពេញខណ្ឌ សែនសុខ
ហេតុការណ៍នេះបានកើតឡើងកាលពីវេលាម៉ោង១០ យប់ ថ្ងៃទី១៧ ខែកក្កដា ឆ្នាំ២០១៨ នៅត្រង់ចំណុចខាងត្បូងវត្តឃ្មួញ តាមបណ្តោយហាណូយ ស្ថិតក្នុងសង្កាត់ឃ្មួញ ខណ្ឌ សែនសុខ រាជធានីភ្នំពេញ។

ជនសង្ស័យទី១៖ ដែលជាអ្នកបើកម៉ូតូមានឈ្មោះ ហេង ដាវិត ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅសង្កាត់ភ្នំពេញថ្មី ខណ្ឌសែនសុខ។ ទី២ដែលជាអ្នកអង្គុយក្រោយមានឈ្មោះ សេន ឡេងភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់ នៅសង្កាត់ ចោមចៅទី១ ខណ្ឌពោធិ៍សែនជ័យ។

តាមប្រភពពីសមត្ថកិច្ចប៉ុស្តិ៍នគរបាលរដ្ឋាបាលភ្នំពេញថ្មីបានប្រាប់អោយដឹងថា នៅមុនពេលកើតហេតុ គឺមានគេរាយការណ៍តាមវិទ្យុទាក់ទងថាមានជនសង្ស័យ២ នាក់ជិះម៉ូតូហុងដាឌ្រីមមួយគ្រឿងបានធ្វើការសកម្ម ភាពឆក់កាបូបនៅខាងមុខផ្សារហេងលី តាមបណ្តោយផ្លូវ២៧១ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក បានសម្រេច ហើយក្រុមជនសង្ស័យបានជិះម៉ូតូគេច ខ្លួនឆ្ពោះឡើងទៅផ្លូវ៥៩៨ ។ បន្ទាប់ពីទទួលបានដំណឹងតាមវិទ្យុទាក់ទងរួចមកកម្លាំងពួកគាត់ក៏បានជិះម៉ូតូល្បាតក្នុងមូលដ្ឋានក្រែងជួប ក្រុមជនសង្ស័យជិះម៉ូតូគេចខ្លួនចូលមកក្នុងភូមិសាស្ត្ររបស់គាត់។ ខណៈ ដែលជិះល្បាតមកដល់ចំណុចផ្លូវ៥៩៨កែងនិងផ្លូវ ១៩៨៦ ដែលជាភូមិសាស្ត្ររបស់ពួកគាត់ ស្រាប់តែប្រទះឃើញជនសង្ស័យទាំង២នាក់ខាងលើជិះម៉ូតូ១ គ្រឿងម៉ាក ហុងដាឌ្រីម ស៊េរី២០១៧ ពណ៌ខ្មៅ ពាក់ ស្លាកលេខ ស្វាយរៀង1J-8936 ដោយធ្វើដំណើរតាមបណ្តោយផ្លូវ១៩៨៦ ក្នុងទិសដៅពីកើតទៅលិច ដែលជាភិនភាគគេរាយការណ៍មកប្រាប់ ។ ដោយមានការសង្ស័យទៅលើជនសង្ស័យទាំង២នាក់នោះកម្លាំងពួកគាត់ក៏បំរុងនិងធ្វើការស្ទាក់ឃាត់ដើម្បីឆែកឆេរនិងសួរនាំ តែពេលដែលជនសង្ស័យឃើញកម្លាំង សមត្ថកិច្ចក៏បានបន្ថែមល្បឿនជិះគេចខ្លួនហើយភ្លាមៗ សមត្ថកិច្ចក៏ធ្វើការជិះប្រដេញតាមពីក្រោយពេលដែលកំពុងធ្វើការជិះប្រដេញតាមផ្លូវ ជនសង្ស័យទាំង២នាក់ខាងលើក៏បានធាក់ទៅលើម៉ូតូរបស់សមត្ថកិច្ចបណ្តាលធ្វើឲ្យសមត្ថកិច្ចផ្ទុះអាវុធបាញ់១គ្រាប់ចំជន សង្ស័យទី២ ដែលអង្គុយពីក្រោយរងរបួសចំដៃស្តាំ។ ភ្លាមៗនោះដែលជនសង្ស័យមិនបានឈប់ម៉ូតូនោះទេ គឺនៅតែបន្តដំណើរទៅមុខទៀត រហូតមកដល់ចំណុច ទីតាំងខាងលើ ជនសង្ស័យទាំង២នាក់ក៏បានផ្តួលម៉ូតូក៏ត្រូវសមត្ថកិច្ច ចាប់ឃាត់ខ្លួនជនសង្ស័យទី១ដែលជាអ្នក បើកម៉ូតូបានភ្លាមៗ។
ចំណែកជនសង្ស័យអង្គុយខាងក្រោយដែលរងរបួសដៃស្តាំបានងើបរត់ទៅលោតចូលប្រឡាយទឹកស្អុយដែលមានដើមកំផ្លោកនិងដើមឈូកដុះទ្រប់ពេញនៅក្បែនោះ លេចបាត់ស្រមោល ដោយបន្សល់ទុកដានឈាម ស្រក់ជាប់និងដើមកំផ្លោក។ ភ្លាមៗនោះ​ កម្លាំងសមត្ថកិច្ចក៏បាននាំគ្នារុករកជនសង្ស័យដែលលោតទឹក ប្រឡាយ ដោយប្រើពេល១ម៉ោងទើបជនសង្ស័យព្រមងើបចេញពីទឹកក៏ត្រូវសមត្ថកិច្ច ឃាត់ខ្លួនតែម្តង។

ក្រោយពេលកើតហេតុជនសង្ស័យទាំង២នាក់រួមទាំងវត្ថុតាងត្រូវបានកម្លាំងសមត្ថកិច្ចនាំយកទៅសាកសួរ និងឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ដើម្បីបន្តនីតិវិធីនៅពេលក្រោយ ៕