បើម៉ូតូកង់បីបត់ឆ្លងផ្លូវមិនប្រយ័ត្នត្រូវរថយន្តហាយឡែនឌ័របុកបណ្ដាលឲ្យខូចខាតយ៉ាងដំណំ
ភ្នំពេញ ៖ បុរសម្នាក់បេីកម៉ូតូកង់បីឥណ្ឌាមួយគ្រឿងបត់ឆ្លងផ្លូវមិនប្រយត្ន័ត្រូវរថយន្ត ហាយឡែនឌ័របុកពេញទំហឹងបណ្ដាលឲ្យរងការខូចខាតយ៉ាងដំណំ
ហេតុការណ៍គ្រោះចរាចរណ៍ខាងលើនេះបានកើតឡើងកាលវេលា ម៉ោង១២និង៣០នាទីរំលងអធ្រាត្រ ឈានចូលថ្ងៃទី១៧ខែមីនាឆ្នាំ២០២០ នៅត្រង់ចំណុចមុខបុរី ម្លិះស តាមបណ្ដោយផ្លូវ២១៧ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកេីតហេតុគេបានឃេីញ ម៉ូតូកង់បីឥណ្ឌាមួយគ្រឿង ពណ៌លឿង ពាក់ស្លាកលេខ ភ្នំពេញ1GU-0756 បើកបរដោយបុរសម្នាក់ធ្វេីដំណេីរតាមបណ្ដោយផ្លូវ២១៧ ទិសដៅពីជេីងទៅត្បូង ខណៈមកដល់ចំណុចកេីតហេតុបានបត់ឆ្លងផ្លូវដោយខ្វះការប្រុងប្រយ័ត្ន ក៏ត្រូវរថយន្តម៉ាកហាយឡែនឌ័រមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ2AN-4783បើកបរដោយបុរសម្នាក់ធ្វេីដំណេីរ តាមបណ្តោយផ្លូវ២១៧ដូចគ្នាទិសដៅពីត្បូងទៅជេីង ក្នុងល្បឿនលឿន ជាន់ហ្វ្រាំងមិនទាន់ ក៏ជ្រុលទៅបុកម៉ូតូកង់បីឥណ្ឌាពេញទំហឹង បណ្ដាលឲ្យកង់បីឥណ្ឌាវិលបីបួនជុំ រងការខូចខាតយ៉ាងដំណំ។ ចំណែករថយន្ត ផ្ទុះពោង បែកធុងទឹកទៅមុខលែងរួច សំណាងល្អម្ចាស់ម៉ូតូកង់បីឥណ្ឌាគ្រាន់តែរងរបួសស្រាល។
ក្រោយពេលកេីតហេតុសមត្ថកិច្ចមូលដ្ឋានបានចុះមកដល់ ក៏បានទាក់ទងទៅជំនាញចរាចរណ៍ មកវាស់វែងយកម៉ូតូកង់បីឥណ្ឌា និងរថយន្ត ទៅរក្សាទុកនៅអធិការដ្ឋាននគរបាលខណ្ឌដង្កោ រងចាំដោះស្រាយគ្នានៅពេលក្រោយតាមផ្លូវច្បាប់៕
