រថយន្តស៊េរីទំនេីបម៉ាកFordពីរគ្រឿងពន្លះគ្នាពេញទំហឹងម្ខាងក្រឡាប់ ម្ខាងខូចខាតផ្នែកខាងមុខ
ភ្នំពេញ ៖ មានរថយន្តស៊េរីទំនេីបម៉ាកFordចំនួន២គ្រឿងបានធ្វេីដំណេីរក្នុងល្បឿនលឿននិងមិនប្រយ័ត្ន ខណៈដល់ចំណុចផ្លូវបំបែកជាបួនក៏បុកគ្នាពេញទំហឹង បណ្ដាលឲ្យម្ខាងក្រឡាប់ផ្ងារជេីង និងម្ខាងទៀតខ្ទេចផ្នែកខាងមុខ បង្កឲ្យមានការភ្ញាក់ផ្អេីលដល់ប្រជាពលរដ្ឋ និងសមត្ថកិច្ចដែលប្រចាំនៅក្បែរកន្លែងកេីតហេតុ នាវេលាម៉ោង១១ និង១០នាទីយប់ ថ្ងៃទី២៧ ខែមីនា ឆ្នាំ២០២០ ក្បែរស្ថានទូតអាមេរិក តាមបណ្ដោយផ្លូវលេខ៦១ កែងផ្លូវលេខ៩៦ ក្នុងសង្កាត់វត្តភ្នំ ខណ្ឌដូនពេញ ។
តាមប្រភពពីសមត្ថកិច្ចបានឲ្យដឹងថា មុនកេីតហេតុគេឃេីញរថយន្តមួយគ្រឿងម៉ាក Ford ពណ៌ខ្មៅ ពាក់ស្លាកលេខ 2AP-9977(ភាគីខាងក្រឡាប់) បានធ្វេីដំណេីរតាមបណ្ដោយផ្លូវ៩៦ ទិសដៅពីលិចទៅក្នុងក្នុងល្បឿនលឿន ខណៈមកដល់ចំណុចផ្លូវកែង នៃកន្លែងកេីតហេតុ ក៏មានរថយន្តម៉ាក Ford ពណ៌ខ្មៅ ពាក់ស្លាកលេខ ភ្នំពេញ 2BD-5080 បានធ្វេីដំណេីរតាមបណ្ដោយផ្លូវ៦១ ទិសដៅពីត្បូងទៅជេីងក្នុងល្បឿនលឿនដូចគ្នា ក៏បុករថយន្តម៉ាកFordខាងលេីបណ្ដាលឲ្យក្រឡាប់ជាច្រេីនត្រឡប់ទៅបុកនិងបង្កាន់ដៃផ្លូវក្រោមដី រងការខូចខាតបន្ថែមទៀត រីឯភាគីរថយន្តបង្កបានរងការខូចខាតផ្នែកខាងមុខយ៉ាងដំណំផងដែរ តែក្នុងហេតុការណ៍គ្រោះថ្នាក់ចរាចរណ៍ខាងលេីនេះមិនបណ្ដាលឲ្យមនុស្សណាម្នាក់រងរបួសនោះឡេីយ ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់ និងទាក់ទងទៅជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វេីការវាស់វែងយកទៅរក្សាទុក រង់ចាំដោះស្រាយគ្នាពេលក្រោយ ៕
