អាណិតណាស់! បុរសម្នាក់បើករថយន្តតាកូម៉ារេចង្កូតបោកផ្ទប់ដើមឈើដាច់ជាពីរស្លាប់គួរឲ្យរន្ធត់
ភ្នំពេញ ៖ បុរសម្នាក់បានស្លាប់បាត់បង់ជីវិត បន្ទាប់ពីបើករថយន្តតាកុមារយ៉ាងលឿនចាប់ហ្វាំងវិលទៅបោកផ្ទប់និងដើមប្រេងខ្យល់ បណ្តាលឲ្យរថយន្តដាច់ជាពីរ កាលពីវេលា ម៉ោង៨និង១០នាទីយប់ ថ្ងៃព្រហស្បតិ៏ ទី៩ ខែមេសា ឆ្នាំ២០២០ តាមបណ្តោយផ្លូវបុរីអង្គរ ក្នុងសង្កាត់ ទួលសង្កែទី២ ខណ្ឌឬស្សីកែវ រាជធានីភ្នំពេញ។
ជនរងគ្រោះ(ស្លាប់)មានឈ្មោះ ឆុន សម៉ុន ភេទប្រុស អាយុ៥២ឆ្នាំ ជនជាតិខ្មែរ មុខរបរចុងភៅ រស់នៅភូមិសែនសុខ សង្កាត់ឃ្មួញ ខណ្ឌសែនសុខ រាជធានីភ្នំពេញ ។
បើតាមប្រភពពីកន្លែងកើតហេតុបានឲ្យដឹងថា មុនដំបូងគេឃើញ រថយន្តម៉ាកតាកូម៉ា ពណ៌ត្របកឪឡឹក ពាក់ស្លាកលេខភ្នំពេញ2D-4130 បើកបរដោយបុរសរងគ្រោះធ្វើដំណើរតាមបណ្ដោយផ្លូវកាំខូរ ចូលទៅបុរីអង្គរក្នុងល្បឿនយ៉ាងលឿន ខណៈមកដល់ចំណុចកើតហេតុ ខាងលើក៏ឮសំលេងជាន់ហ្វ្រាំងស្រាប់តែរថយន្តវិលបោកផ្ទប់ទៅនឹងដើមប្រេងខ្យល់បណ្ដាលឲ្យរថយន្តដាច់ជាពីរ ហើយបុរសរងគ្រោះខាងលើហ្នឹងត្រូវបានស្លាប់ភ្លាមៗនៅនឹងកន្លែងកើតហេតុតែម្ដង ។
ក្រោយពីកើតហេតុសមត្ថកិច្ចបានមកដល់កន្លែងកើតហេតុធ្វើកំណត់ហេតុប្រគល់សព និងរថយន្ត ឲ្យទៅសាច់ញាតិយកទៅធ្វើ បុណ្យតាមប្រពៃណីនៅឯគេហដ្ឋាន៕
